Te Rautaki Matihiko mō Aotearoa
Te whakamana i te iwi, ngā hapori, te ōhanga, me te taiao o Aotearoa kia puāwai, kia whaihua i te ao matihiko.
14 o Hepetema 2022
Kupu whakataki a te Minita
E ngā mana, e ngā reo, e ngā karangatanga maha huri noa i te motu, tēnā koutou, tēnā koutou, tēnā koutou katoa. Nōku te maringanui ki te whakaara i tēnei Te Rautaki Matihiko mō Aotearoa.
Kei te wāhi tino tata a Aotearoa ki tētahi whai wāhitanga nui ki te hoahoa, te hanga me te whakamahi i ngā hangarau mā ngā tikanga whakaihu waka, matatika, tōkeke e whakaata ana i te ahurea me te ahurei o tō tātau whenua.
Kia taea e tātau tērā, me tuku i ngā pātai uaua ki a tātau anō pērā i ēnei:
- Me pēhea e whakawhānui atu ai i te kaha pono tūturu o Aotearoa mō te painga o te iwi whānui, me te ōhanga?
- He aha te hira mēnā ko tātau te whenua tuatahi ki te whai i te whakatinanatanga matatika o te Atamai Hangahanga?
- E māia ana tātau ki te tuku i ngā painga o te whakaaroaro matihiko matawhānui?
He whai wāhitanga ngā hangarau matihiko ki te takahuri i te āhua o te tuku i ngā ratonga, te āwhina i a tātau ki te whakarite i ngā take nui pērā i te huringa āhuarangi, me te whakakaha i tō tātau ōhanga mā te whanaketanga o ngā hoko whakawaho auaha, mariko.
E whakatakoto ana tēnei Rautaki Matihiko tuatahi mō Aotearoa i te hao nui me te ahunga mō ngā mea e hiahia ana tātau ki te whakatutuki, e āhukahuka ana i ngā whakapātaritari me ngā whai wāhitanga, me te whakatau i te mahere mahi tuatahi hei whai i te ara ki reira.
Me hao nui tātau, me māia, me te whakamahi i ngā āhuatanga e tiketike ai a Aotearoa hei ārahi i a tātau ki te ao. Ko te kōrero a tētahi kaumātua, he whai wāhitanga nui tō tātau ōhanga matihiko anamata. Mēnā ka āhei atu ngā tāngata katoa, ka puāwai, ka momoho a Aotearoa.
E 3 ngā kaupapa hira o te Rautaki: Mahi Tika, Mahi Tahi, Mahi Ake.
Ko ngā mahi ka kaunekehia i roto i ēnei kaupapa ka noho hei tūāpapa e ara ai tātau hei whenua matihiko whakaihu waka e whakahīhī ai tātau. E whakaata anō te Rautaki i te kawenga o te Karauna ki te whakamana i Te Tiriti o Waitangi i roto i ana mahi puta noa i te whaitua matihiko.
Puta noa i ngā kōrerorero tahi mō te Rautaki, he hōnore mōku te rongo i ngā tāngata puta noa i Aotearoa e kōrero ana mō te āhua o tētahi anamata matihiko mō Aotearoa ki a rātau. Ko tēnei Rautaki te hīkoi tuatahi ki taua anamata, ā, ko te tūmanako ka whai mai koe. I Aotearoa, ko tātau te tuatahi ki te kite i te rā āpōpō. Ka nui te tika o tēnei kōrero.
Nāku iti nei,
Hōnore Tākuta David Clark
Minita mō te Ōhanga Matihiko me Ngā Whakawhitiwhitinga
Kupu whakataki a te Tumuaki
E ngā hau e whā o te motu tēnā koutou, tēnā koutou, tēnā koutou katoa. Ko ngā kupu whakataki a Ngā Kaiwhakahaere Matua a te Kāwanatanga Matihiko e pā ana ki te whakatakoto i to tātou ahuatanga rautaki.
To the 4 winds from across our nation greetings, greetings one and all greetings. This is the foreword and welcome from the chief executives of contributing agencies.
Kāore te hītori matihiko o Aotearoa i te tino tawhito. I whakaurua mai te rorohiko tuatahi i Aotearoa ki Te Tai Ōhanga i te tau 1960 hei tukatuka i te rārangi utu o ngā kaimahi kāwanatanga tata ki te 32,000. Ā, i te 60 tau i muri mai kua tino whai wāhi te rorohiko, pūmanawa rorohiko me ngā raraunga matihiko ki ō tātau ao o ia rā, ā, kei reira noa iho e noho ana.
Kei te tere te hurihuri o ngā panonitanga. Ka āwhina te Rautaki Matihiko mō Aotearoa ki te whakarite ka whakatakoto a Aotearoa whānui i tētahi ara mārama mō tētahi anamata matihiko momoho, tōkeke, mō ngā reanga o ēnei rā me āpōpō. Ko ngā painga ka taea puta noa i Aotearoa o ngā hangarau matihiko, ā-raraunga hoki he nui — mai i te whakamana i ō tātau rangatira onāianei me āpōpō, ki te whakangāwari i te huringa āhuarangi — engari e kore e tutuki ki te kore e kakama, e pūmau, e ngātahi te mahi.
I mahi tahi a Hīkina Whakatutuki, Tatauranga Aotearoa, me Te Tari Taiwhenua ki te waihanga i tēnei Rautaki, i te taha o ētahi atu tari kāwanatanga. I toro anō mātau ki ngā mōhio me ngā whakaaro o ngā tāngata me ngā whakahaere tokomaha i roto i te tukanga kōrerorero tahi i whakahaerehia mai i te Oketopa ki te Tīhema 2021. Me mātua mahi tahi tonu ngā tari kāwanatanga, me ngā tari whānui, ngā hapori me te rāngai tūmataiti, kia tino hono tahi me te whaitake i roto i tā tātau aronga.
Ka mahi tahi ngā Tumuaki hei Poari Matihiko Matua tuatahi ki te whakarite ka angitu tēnei Rautaki me tōna whakatinanatanga. He tīmatanga noa tēnei Rautaki, ā, me arotake haere tonu he aha ngā mahi kei te mahia, pēhea te kaha o te pānga o aua mahi, me te neke i tā tātau titiro, ki te whai i te uaratanga me ngā whāinga o te Rautaki.
Nō ngā Kaiwhakahaere Matihiko matua,
Paul James
Tumuaki, Te Tari Taiwhenua
Kaiārahi Matihiko Matua a te Kāwanatanga
Carolyn Tremain
Tumuaki, Hīkina Whakatutuki
Mark Sowden
Kaitatau a Kāwanatanga me te Tumuaki, Tatauranga Aotearoa
Kaitiaki Raraunga Matua a te Kāwanatanga
He uaratanga mō tētahi Aotearoa matihiko
Ko tā tātau uaratanga ko te whakamana i te iwi, ngā hapori, te ōhanga, me te taiao o Aotearoa kia puāwai, kia whaihua i te ao matihiko.
Ka pēhea tōna āhua ā te tau 2032 mēnā ka tutuki i a tātau tēnei uaratanga?
- He wāhi tōkeke ake, auaha ake a Aotearoa, ā, he kaha tōna manapori me tōna ōhanga. He pakari, he toitū tō tātau whenua, ā, he takatū mō te anamata.
- E tautoko ana ngā hangarau matihiko me ngā raraunga i te oranga, e whakarato ana i ngā whai wāhitanga kia ‘whiwhi oranga, ako, me te momoho’. Ka toro atu ngā tāngata katoa me te whakamahi i te ipurangi me ngā hangarau matihiko mā ngā tikanga e tino pai rawa mō rātau. He pono, he wātea ngā utauta me ngā ratonga matihiko.
- Ka pono tātau ki ngā whakahaere ki te kohikohi, te whakamahi, me te rokiroki i ā tātau raraunga mā ngā tikanga haumaru me te ahurea. He wāhanga hira ngā tirohanga a te Māori nō te pūnaha matihiko me te raraunga.
- E whakaata ana ā tātau tikanga mahi, me ngā hua me ngā ratonga ka hangaia e tātau i ngā āhuatanga ahurei me te hītori o tō tātau whenua.
- He haumaru, he rāhiri ngā wāhi tuihono e tauwhitiwhiti ai tātau.
- Ka whakamahia e ngā iwi, ngā hapū, te kāwanatanga me ētahi whakahaere i ngā utauta, ratonga me ngā raraunga matihiko hei raparongoā, te tautoko i te whakaaturanga ahurea, me te tautoko i te mahi a ngā tāngata.
- Ka whakamahia e tātau ngā hangarau raraunga me te matihiko ki te whakarite i ngā take nui o tō tātau wā pērā i te huringa āhuarangi.
- Ko tā te pūnaha rauropi e taurikura ana he hanga me te hoko hua me ngā ratonga matihiko i roto o Aotearoa me te ao whānui. He tino kanorau tō tātau ohu mahi hangarau pērā i te taupori o te motu, ā, ka momoho te tangata i ngā ara mahi matihiko whaihua.
- Ka ako, ka urutau te tangata me te whai pūkenga matihiko hou puta noa i ō rātau rā. Ka āhei atu te tangata ahakoa ko wai ki ngā tūmomo rauemi whānui me ngā whakangungu puta noa i tō rātau wāhi mahi, tō rātau hapori me te mātauranga ōkawa. He tōtika, he haumaru te ipurangi me ngā tūāhanga raraunga e whakarato ana i te motu whānui. Ka ahei atu te tangata ki ngā pūrere matihiko me ngā tūhononga ipurangi ngāwari te utu.
- Ka whakarato ngā tari kāwanatanga i ngā ratonga matawhānui, tōkeke, pono, ā-kaiwhakamahi e whakamana ana i Te Tiriti o Waitangi me ōna mātāpono. Ka urupare te kāwanatanga ki ngā ia matihiko e ara ake ana. He whakarite i ngā mōrea, he hāpai i ngā whai wāhitanga, me te mahi tahi i te motu me tāwāhi.
E whai ana tēnei Rautaki ki te āwhina kia tinana tēnei uaratanga. Ko te hiahia kia eke a Aotearoa ki tōna tūranga hei whenua matihiko whakaihu waka i te ao, he pono, ā, he momoho hoki.
Ko ngā kaupapa rautaki e toru mō te Rautaki me te ine i tō tātau anga whakamua
Ka takea mai te Rautaki mai i ngā kaupapa tūhono e 3, ā, e tautokona ana e ngā whāinga me ngā inenga. Mā te ine i te anga whakamua e ai ki te Mahi Tika, Mahi Tahi, me te Mahi Ake ka āwhina i a tātau ki te whakatutuki i tā tātau uaratanga mō tētahi Aotearoa matihiko.
Mahi Tika
Ngā Whāinga
- Ka haumaru te iwi o Aotearoa, ā, e whakamanahia ana rātau i ngā wāhi tuihono.
- Ka hoahoa, ka whakamahi ngā whakahaere me ngā pakihi i ngā hangarau matihiko me ngā raraunga mā ngā tikanga tika, ā-ahurea, tōtika, me te pono.
- E hāngai pū ana ā mātau hangarau matihiko me te raraunga ki te kaupapa, ā, he haumaru.
Ngā ritenga
- He haumaru ngā tāngata katoa o Aotearoa, ā, he haumaru i runga ipurangi.
- He iti iho ngā whakaeke ā-ipurangi i Aotearoa tēnā i ētahi atu whenua ōrite.
- Ka taea e te iwi katoa o Aotearoa te whakamahi te tuakiri matihiko kua whakatūturuhia mēnā ka hiahia rātau.
Mahi Tahi
Ngā Whāinga
- Kua whai utauta, pūkenga me te ngākau titikaha te iwi katoa o Aotearoa kia whai wāhi ki tētahi pāpori matihiko e tipu ana.
- E ū ana ngā tūāhanga matihiko, ngā ihirangi me ngā ratonga ki ngā hiahia kanorau o te tangata.
Ngā ritenga
- E wātea ana te ipurangi tino tere ki te iwi katoa o Aotearoa.
- Kei te iwi katoa o Aotearoa ngā utauta, ngā pūkenga me te ngākau titikaha ki te mahi i ngā mea e hiahia ana rātau i runga ipurangi.
- Ka taea e ngā tāngata katoa o Aotearoa te utu tētahi tūhononga ipurangi kounga me tētahi pūrere ā-ipurangi.
Mahi Ake
Ngā Whāinga
- Ka auaha ā tātau pakihi, whakahaere hoki me te whakapiki i te whakaputaranga mā ngā hangarau matihiko me ngā raraunga.
- He momoho, he tere te tipu, he tuwhera tō tātau rāngai hangarau.
Ngā ritenga
- Kei te koke tika ngā hangarau matihiko me ngā mōhiohio me ngā whakawhitiwhiti (ICT) hoko whakawaho kia eke ai hei kaiwhiwhi hoko whakawaho matua mō Aotearoa.
- Ka whānau mai ngā pakihi katoa o Aotearoa kia matihiko, ā, e tautokona ana ki te whai i ngā utauta matihiko e whaikiko ana ki a rātau.
- Neke atu i te 10% o te ohu mahi o Aotearoa kei te rāngai matihiko i roto i ngā mahi uara teitei.
Ngā kaupapa e 3 i te reo Māori
He ingoa Māori tō ia kaupapa e 3, e tautokona ana e tētahi ingoa Ingarihi. Ehara i te mea he mea whakamāori ā-kupu i ēnei ingoa Māori e 3 mai i ngā huatau Ingarihi, engari e tautoko ana ngā huatau e rua tētahi ki tētahi.
- Mahi Tika — Trust
- Mahi Tahi — Inclusion
- Mahi Ake — Growth
Ka mahi tahi ēnei kaupapa, ā, e tautokona ana e ngā tūāpapa pakari
Whakaahuatanga āmiki o te hoahoa
He hoahoa Venn te Hoahoa 1 me ngā porohita pūtahi e 3. E whakaatu ia porohita i te 1 o ngā kaupapa e 3: Mahi Tika, Mahi Tahi, Mahi Ake. E paiherea ana ēnei kaupapa e ngā pūkenga me te mātauranga, te toitūtanga, me te tūāhanga matihiko.
Me paihere i ngā kaupapa mā te tino arotahi ki:
- ngā pūkenga me te mātauranga
- te toitūtanga, me
- te tūāhanga matihiko.
Ko Te Tiriti o Waitangi te tuhinga tūāpapa o Aotearoa me tētahi ara ki te whakakaha i te pātuitanga i waenga i te Māori me te Karauna. Me mātua noho ko Te Tiriti o Waitangi me ōna mātāpono te iho ina mahi ana ki te tautoko i ngā kaupapa e 3. Ka pātui mātau me ngā iwi me te Māori ki te whakatutuki i ngā wawata o te Rautaki me te whakarite i ngā putanga tōkeke mō te Māori ina whakamahia e te kāwanatanga ngā raraunga hei whakamōhio i ana whakatau.
Kāore e noho taratahi ana ngā kaupapa e 3. Ka tūhono te mahi tika, mahi tahi, me te mahi ake tētahi ki tētahi mā ngā tikanga maha:
- Ka tautoko ngā kaupapa tētahi ki tētahi. Hei tauira, mā te whai i ngā tūmomo tāngata kanorau e waihanga ana i ngā hangarau ko te mutunga atu ka pono ake te tangata ki te hangarau. Mā te whakapiki i te pono ka tautoko i te tipu o te ōhanga mā te whakapai ake i te ingoa pai o Aotearoa hei pātui tauhokohoko tōtika.
- Ka taka pea ngā mahi me ngā take ki ngā kaupapa maha. Hei tauira, he mea nui te tūāhanga ipurangi hāngai pū ki te mahi tahi me te mahi ake. He mea nui te whakarite he pakari te tūāhanga, ā, he haumaru mō te mahi tika me te mahi ake.
- Ka kitea te taukumekume i waenga i ngā kaupapa. Hei tauira, hei hanga i ngā pūnaha matihiko me te raraunga tika me te matatika, me āta whakature pea, te ārai rānei i ētahi whakamahinga o ngā hangarau matihiko e tipu ai pea tō tātau ōhanga.
Ngā kaupapa tuatahi tino hira
Kei roto i ngā kaupapa ko te:
- Digital Boost
- Whakapai ake i te tūhonohono ki tuawhenua
- Te whakatere ake i te auahatanga Māori
- Te Karanga a Ōtautahi
- Te Rautaki Whakamaru Ipurangi o Aotearoa
- Ngā raraunga hei utauta mō te whakatau tikanga me te oranga
- Takuhe Whanaketanga Auahatanga
- Mana Whakahaere Raraunga Māori
- Mahere Takahuritanga Ahumahi Hangarau Matihiko
- Pou Tarāwaho Pono a Ngā Ratonga Tuakiri Matihiko
- Te Ara Paerangi.
Me pēhea tātau e mōhio ai kua angitu tātau?
Mā ngā whakaritenga mō ia kaupapa e ārahi tā tātau hīkoi me te āwhina i a tātau ki te aromatawai i te anga whakamua. I āta whakatauhia kia taumata teitei tonu ēnei whakaritenga, ā, ka rerekē pea i roto i te wā. He uaua te whai raraunga kounga mō ngā wāhanga matihiko o tō tātau iwi, ōhanga hoki. Ka whakapai haere tonu mātau i ēnei whakaritenga me ngā tikanga mō te kohikohi raraunga.
Te whakatinana i ngā wawata Māori
Mā te whai i tētahi anamata momoho me te tōkeke mō Aotearoa ka tuku i tētahi whai wāhitanga tino hou hei whakatinana i ngā wawata o te tangata whenua me te hoa Tiriti o Waitangi i te ao matihiko, ā-takitini, ā-takitahi hoki.
Kua kite tātau mai anō kāore ngā pūnaha me ngā kaupapa i te hāngai ki te Māori me rātau o Te Moananui-a-Kiwa, ā, e hia whakatipuranga pea te roa e eke ai tātau ki te wāhi tika [ki te mana ōrite]. Ko te mea tino whakaongaonga i ahau mō tēnei tukanga, he hou, ā, ka taea e tātau te whāngai kōrero mō tōna āhua, me tātau kei waenganui pū.
I ara ake ngā kaupapa matua e whā mai i te whakawhitiwhiti kōrero me te Māori mō ō rātau wawata mō te Rautaki. E whakaata ata te Rautaki i ēnei kaupapa. Me tino aro ngā kaupapa me ngā pūtea ki te whakatinana haere i tēnei Rautaki ki ēnei kaupapa matua.
- Ko te rangatahi te anamata o te hangarau. Ko te tikanga ka haumaru te hangarau, ā, he wāhi manaaki i te rangatahi. Me momoho te ao Māori me te whakaawe i te āhua o te waihanga i ngā raraunga, matihiko me ngā hangarau.
- Kia tūturu te mahi tahi mō te uaratanga me ngā mahi. Me mātua mahi tahi tātau ki te whakatutuki i ngā koronga o te Rautaki, e manaaki ai a Aotearoa i te taha matihiko, me mātua aro tēnei mahi tahi ki ngā wawata me ngā hiahia o ngā whānau me ngā hapori.
- Te whakakaha i te tuakiri ahurea me te oranga. Ka taea e te hangarau matihiko te āwhina ki te whakarauora te tuakiri ahurea me te oranga mā te whakapai ake i te āhei atu me te tiaki i te mātauranga Māori mō te hunga e hiahia ana.
- Ka kōkiri ngā aronga ‘Mā te Māori, mō te Maori’ i ngā huringa. Ko te nuinga o ngā kauneketanga i ngā raraunga, te ao matihiko me te hangarau kāore i hangaia mō te Māori. Hei hanga i ngā putanga tika, tōkeke hoki mō te Māori, me noho tuwhera te Rautaki ki ngā aronga ‘Mā te Māori, mō te Māori’.
[Me whakaarotau tātau] i ngā hononga tika me te whakarite i ngā hiahia [o ngā hapori] kaua te tuku mea noa iho ki a [rātau]. Te waihanga i ngā pūnaha ka hāpai i ngā wawata o ngā hapori Māori. He whakamana i te hangarau.
Hoahoa Huatau Mātauranga Whakatere Tawhito
Ka whakamahi te Hoahoa Huatau Mātauranga Whakatere Tawhito i ngā mōhio o te ao Māori ki te ao matihiko. Ka toro i ngā mātauranga whakaterenga tawhito o te Māori me Poronīhia hei tauira whakarite mō te āhua o te whakauru a te Māori ki ngā rāngai matihiko, raraunga me te hangarau ā tōna wā. I whakamahia e ngā tāngata i rō waka hourua ēnei mātauranga ki te whakatere, te tūhura me te hōpara i Te Moananui-a-Kiwa.
Ka tautoko te pou tarāwaho i te Māori ki te tūhura i ngā whai wāhitanga nui o te hangarau hou. Ka whakaatu anō hoki ki te hunga rangahau mā te whakamahi i ngā mōhiotanga STEAM (pūtaiao, hangarau, pūkaha, ngā toi me te pāngarau) ki ngā raru me ngā whai wāhitanga ka whai tēnei i ngā tapuwae o ō rātau tīpuna.
Kei te hangaia e Te Tari Taiwhenua te hoahoa huatau mō tētahi pou tarāwaho mātauranga i te taha o ngā tohunga whakatere waka Māori me Ngā Rōpū Whakahaere Waka Hourua ā-Motu. Ka tautoko tēnei hoahoa huatau i te kaupapa Mana Whakahaere Raraunga Māori mō Tatauranga Aotearoa, ā, kei roto ko tētahi Pou Tarāwaho Waka Hourua hei tauira whakarite mō tētahi pātuitanga Tiriti me te Rōpū Raraunga o Ngā Rangatira ā-Iwi.
Te Tiriti o Waitangi
Ko Te Tiriti o Waitangi o Waitangi te tuhinga taketake o Aotearoa, ā, he ara mō te whakakaha i te pātuitanga i waenga i te Māori me te Karauna. Me mātua noho ko Te Tiriti o Waitangi me ōna mātāpono te iho ina mahi ana ki te tautoko i ngā kaupapa e 3 o tēnei Rautaki.
I whakaaroaro mātau ka pēhea pea te whakamōhio a te Tiriti i tētahi kaupapa mō te tūāhanga matihiko. Ka whakaaro ake mō te Upoko 1 — ko te kāwanatanga ko te whakahaere ngātahi, Upoko 2 — ko te rangatiratanga ko ngā mea ka whakahaerehia e tātau ake, ko te Upoko 3, ko te waihanga i ngā putanga tika.
Mā te whakamana i Te Tiriti o Waitangi me ōna mātāpono i roto i te Rautaki ka whakarite kei te tika, kei te tōkeke ngā putanga puta noa i ngā kaupapa e 3. Me whakarite anō kei roto te tangata whenua me ngā pātui o Te Tiriti o Waitangi i ngā whakatau me ngā wāhi katoa o tēnei mahi, otirā hei kaiārahi.
Te tautoko i te tūhonohono matihiko o ngā marae — Mātai take: Ngā Whatunga Iahiko a Ngā Marae
Mā Ngā Whatunga Iahiko a Ngā Marae ka āhei atu ngā marae ki tētahi tūhononga aunui ka utua me ngā pūmanawa mārō hāngai hei tautoko i te whānau me te hapū ki te whakahaere i ngā mahi ōhanga me te hāpai ake i ō rātau kaha matihiko.
E whakahaerehia ana te kaupapa, he $22.4 miriona te pūtea kāwanatanga kei roto, i waenga i Ngā Patui Tūāhanga Karauna, Kānoa me Te Puni Kōkiri. Kua tūhonoa te kaupapa ki ngā marae neke atu i te 560 puta noa i te motu. Kua tūhono anō ki ngā pokapū matihiko hapori 16 atu anō.
Te take he mea nui te tūhonohono marae
Ko te marae te tumu herenga o te ao Māori mai anō, mai anō. He wāhi e tirotirohia, e werohia, e tohea ngā tikanga a te Māori. He wāhi tapu te marae, ā, he mea nui tēnei ki te Māori.
E whakarato ana te kaupapa i te tūhonohono aunui, pūmanawa mārō hei whakatū i te Wi-Fi i te marae, te whakangungu me ngā tautoko hangarau, me te aunui koreutu mō te 5 tau. Nā te pūmanawa mārō ka taea ngā hui ataata mō ngā hui mariko me ngā whakawhitiwhiti tuihono.
Kei te āwhina te tūhonohono matihiko marae i ngā whānau, ngā hapū me ngā iwi ki te whakatutuki i ō rātau whāinga me ō rātau wawata tae atu ki te whakaurunga pāpori, ngā hononga ahurea me te whai wāhi ki te hapori whānui ake. Ka taea anō te tuku ara ki ngā ratonga hauora, pāpori, me te mātauranga.
Ko ētahi o ngā painga:
- ko te tino āhei o te Māori ki te toro i ngā ratonga me ngā pūkenga e hiahiatia ana kia pai ake te whai wāhi ki te ōhanga
- ko ētahi atu tikanga mō te rangatahi me ngā whānau ki te ako i ngā pūkenga mō tētahi ohu mahi hou
- ka nui ake te whakaputaranga o ngā ohu pakihi paetata, hou hoki
- ka whai hua i ngā toronga tāpoi mō te tipuranga ōhanga
- te tūhono ki ngā whānau e noho ana i waho o te rohe me tāwāhi.
Ngā whai wāhitanga me ngā whakapātaritari
Nā te whakapau kaha ki te uaratanga o tēnei Rautaki ka tuwhera mai ngā whai wāhitanga nui hei whai me ngā whakapātaritari hei whakatutuki. Kei roto i tēnei wāhanga ko ētahi o ēnei whai wāhitanga, whakapātaritari hoki.
Ngā whai wāhitanga
Ngā whakapātaritari
Mahi Tika
Te whai i ngā mea e tika ana mō tētahi anamata matihiko tiketike i te ao.
Ngā Whāinga
- Ka haumaru te iwi o Aotearoa, ā, e whakamanahia ana rātau i ngā wāhi tuihono.
- Ka hoahoa, ka whakamahi ngā whakahaere me ngā pakihi i ngā hangarau matihiko me ngā raraunga mā ngā tikanga tika, ā-ahurea, tōtika, me te pono.
- E hāngai pū ana ā mātau hangarau matihiko me te raraunga ki te kaupapa, ā, he haumaru.
Ngā take matua
- Ko te whakaaro mō Aotearoa he kirirarau aowhānui pono me te iti noa o te hēnga me te āhua nui tonu o te pono ki ngā whakanōhanga. I te whanaketanga o te hangarau, ā, me whanake ā tātau whakanōhanga me ngā pūnaha mā ngā tikanga matatika, whakawhirinaki hoki.
- He wāhanga hira te pono nō te whakaurunga matihiko. He mea taketake tēnei mō te whakatere ake i te auahatanga matihiko, ā-raraunga me te takahuritanga puta noa i Aotearoa. Ko te tikanga o te pono kei te rata me te ngākau titikaha ki te tangata, ngā hapori me ngā whakahaere ina whakamahia e rātau, ka pā rānei, ki ngā hangarau matihiko, ā-raraunga hoki.
- He mea waiwai te pono i roto i ngā pūnaha matihiko:
- Ko te tikanga me pono te tangata kei te uru ki te ipurangi kāore e pā mai te whakaweti tuihono, whakahāwea rānei ki a ia.
- Ko te tikanga me pono te hunga hoko hangarau mō tā rātau pakihi ka tōtika, ka haumaru, ka ū hoki ki ō rātau hiahia.
- Ko te tikanga me pono te hunga ka whai pānga ki ngā whakatau nā ngā raraunga me ngā hātepe papatono i tika te whakamahi i ā rātau raraunga.
- Ko te tikanga me pono te Māori ka āta whakamaruhia ō rātau mōhiotanga ahurea, pānga hoki i roto i ngā tauwhitinga matihiko.
Ngā kaupapa matua
He ine i te angitu atu ki te tau 2032, ā, ki tua atu
- He iti iho ngā whakaeke ā-ipurangi i Aotearoa tēnā i ētahi atu whenua ōrite.
- Ka taea e te iwi katoa o Aotearoa te whakamahi te tuakiri matihiko kua whakatūturuhia mēnā ka hiahia rātau.
- He haumaru ngā tāngata katoa o Aotearoa, ā, he haumaru i runga ipurangi.
Ngā mea e hiahia ana tātau
Ko te hiahia kia whai a Aotearoa i ngā pūnaha matihiko tiketike i te ao e pono ana, e whirinakitia ana e tautoko ana i te oranga me te whakapūmau i a tātau hei whenua mōhiotia ana, whakaihu waka i te ao. Hei Mahi Tika he kaupapa tino whānui tēnei, e 3 ō tātau whāinga:
- Ka haumaru te iwi o Aotearoa, ā, e whakamanahia ana rātau i ngā wāhi tuihono.
- Ka hoahoa, ka whakamahi ngā whakahaere me ngā pakihi i ngā hangarau matihiko me ngā raraunga mā ngā tikanga tika, ā-ahurea, tōtika, me te pono.
- E hāngai pū ana ā mātau hangarau matihiko me te raraunga ki te kaupapa, ā, he haumaru.
Ko te nuinga o te iwi Aotearoa he tauwhitiwhiti i ngā wāhi tuihono tūmatanui i ō rātau ao o ia rā. Me haumaru, me manaaki ēnei wāhi mō te katoa, tae atu ki ngā pūhara pāpāho pāpori. Ko te tere me te nui o ngā ao matihiko ka taea te whakanui ake ngā pānga kino o ngā ihirangi kino — tae atu ki te whakaweti tuihono, ngā kōrero whakarihariha, te tuari ihirangi houhou, ngā kōrero horihori me ngā kōrero parau. Me whai tukanga ā tātau pūnaha hei whakarite i te haumaru tuihono. Me whai pūkenga me te mōhio anō hoki te iwi o Aotearoa kia haumaru, kia whai whakaaro te tauwhitiwhiti ki ngā pūhara tuihono.
He mea nui kia kaua e pono noa iho, engari kia whirinaki anō ki aua pūnaha. Ahakoa ka taea te whakatipu te pono mā ngā tikanga maha kāore pea e hiahia kia whirinakitia tētahi pūnaha, hei tauira, mā te torotoro i te parani me te tauhokohoko, ehara koinei tā tātau e whai nei.
Ehara i te mea he ōrite te pono o ngā tāngata katoa. Hei tauira, e whakaatu ana ngā rangahau he iti iho te pono o te Māori ki te ratonga tūmatanui me ngā rāngai tūmatanui tēnā i te Pākehā.[Footnote 1]
I kitea e tētahi pūrongo mō ngā tirohanga kaiwhakamahi a ngā iwi o Te Moananui-a-Kiwa ko te whakaaro o te tokomaha mō te ao tuihono he tāware, ā, he whai ihirangi pāpāho pāpori pāhekeheke.
Pūrongo: Ngā kitenga kaiwhakamahi mahi tahi matihiko—Nga iwi o Te Moananui-a-Kiwa
Nō mua rā anō pea te kore pono ki ngā hangarau matihiko, ā, ka ahu mai i te kore pono ki ngā pūnaha kei roto rātau.[Footnote 2] Nō reira, kia whiwhi ai, kia ū rā anō te pono o te iwi whānui ki ngā hangarau me ngā raraunga matihiko, ko ngā whakanōhanga e whakamahi ana i ēnei me mātua whakawhirinaki ērā. He mea hira hoki tēnei ina whakamahia e te kāwanatanga ngā hangarau matihiko, ā-raraunga, i te mea ka taea te whakatau tikanga hira mō ngā ao o ngā tāngata me te tohanga o ngā rauemi.
He mahi uaua, tino pūkenga hoki te hanga i ngā pūnaha matihiko pono, hāngai ki te kaupapa. Ka hangaia e ngā tāngata whai pūkenga motuhake rerekē i ngā tūāhanga hangarau hou, mai i ngā taura ki te waehere, i roto i ngā tau maha. He pānga ohorere, āhuatanga maha ka puta pea i tētahi hātepe papatono, taupānga rānei. Hei whakarite ka whakawhirinaki ki ngā pūnaha me ngā ratonga matihiko, me mātua whai te hunga e waihanga ana i ērā i ngā paerewa hangarau me te matatika tōtika. Me mātua whakarite me te tautiaki i ā rātau pūnaha, ratonga hoki. Me mātua whakarite rātau kei te nui tonu ngā kaimahi whai pūkenga e wātea ana ki te whakapai ake, tautiaki me te whakahaumaru i ngā pūnaha i roto i te wā.
He tika, he pūrangiaho, he haumaru me te takohanga ngā pūnaha matihiko me te raraunga pono. Me paihere ēnei i ngā hiahia o te hunga e tino pāngia ana me te whakamana i Te Tiriti o Waitangi me ōna mātāpono. He mea nui te pono ina kohikohi ana i ngā raraunga, te tātari mā te atamai hangahanga (AI) me ētahi atu hātepe papatono, me te whakamahi i ēnei hei whakatau tikanga.
Me mātua whai tūāhanga whakawhitiwhiti haumaru, hāngai ki te kaupapa mātau kāore e rarua ana e ngā whakararuraru me ngā wetonga nui. Ina pā mai ngā wetonga, ka whai pānga ki ngā pakihi, ngā whakahaere me ngā hapori whānui ake. Hei tauira, i turakina e te whakaekenga pūmanawa kino tāwai i te tau 2021 i pā ki te Poari Hauora ā-Rohe o Waikato ngā pūnaha IT i ngā hōhipera e 5, i whakararu i ngā rārangi utu, ā, i mate te tuku i ētahi tūroro ki wāhi kē kia whakamaimoatia.
He maha ngā hangarau me ngā pūnaha matihiko ka hangaia i tāwāhi, arā, kāore e tino whai kaha a Aotearoa ki te waihanga me te whakature i ēnei utauta me ēnei pūhara. Tāpiri atu ki te waihanga i tā tātau ake pūnaha rauropi pono, me whakawhānui haere tonu te kāwanatanga me ētahi atu whakahaere i ngā hononga me ngā mahi ngātahi o te ao hei āwhina ki te ahu i tētahi pūnaha rauropi matihiko aowhānui pono.
Ngā wāhi arotahi: Mahi Tika
Ehara i te mea he tūturu te pono, ā, ka rerekē pea i roto i te wā. Me whai tātau i ngā pūnaha matihiko me te raraunga e whirinakitia ana ināianei, me te wā roa. Me whakapau kaha haere tonu, me tētahi aronga kakama hei tautuhi i ngā mōrea me ngā whai wāhitanga ka taea.
Ka taea e tātau te mahi i ngā wāhi e 3 hei waihanga me te pupuri i te pono:
- te whakauru mai i ngā pae ārai tika
- te ahuahu tahi i te anamata o ngā hangarau matihiko, ā-raraunga hoki
- te whakaū i ngā aronga urutau ki te haumarutanga ipurangi, te haumaru tuihono me te pakari o te tūāhanga.
Te whakauru mai i ngā pae ārai tika
Kia whiwhi ai i ngā hangarau matihiko pono, me whai ture tātau me ngā aratohu mō te whakamahi i ēnei kia matatika, kia tōtika hoki. Ko tā ēnei pae ārai he whakatūturu i te āhuatanga mō te hunga e waihanga ana me te whakamahi i ngā hangarau matihiko. He tiaki i ngā tika o te hunga e whai pānga ana i ngā hangarau matihiko.
Me mātua mārama, matawhānui, me te māmā ngā ture me ngā aratohu hei whai kia mārama ai te tangata me pēhea te whakatutuki i ō rātau herenga. Kua whakaritea kētia e ētahi ture hira ētahi āhuatanga o te pono, pērā i te Privacy Act 2020 me te Harmful Digital Communications Act 2015. Kua whakaurua ngā ture hei hanga i tētahi pou tarāwaho pono mō ngā ratonga tuakiri matihiko ki te Whare Pāremata. I tua atu i te ture, he pou tarāwaho, he aratohu, he paerewa hoki ā tātau e whakarite ana i ngā tūmomo āhuatanga o te pono.[Footnote 3] Kei roto i ēnei ko te Tūtohinga Hātepe Papatono mō Aotearoa, ngā aratohu a Ngā Tikanga Paihere me te Tūmataitinga, te pou tarāwaho Ngā Tika Tangata me te Matatika.
Kei roto i ngā whai wāhitanga o ēnei tau e heke iho:
- ko te waihanga i tētahi aronga whai kawenga me te matatika ki ngā hangarau matihiko, tae atu ki te mana whakahaere me te whakahaere hei whakarite ka whakawhirinaki ki ngā pūnaha
- te tautuhi me te whakakīkī i ngā whāruarua kei roto i ngā ture me ngā paerewa onāianei, tae atu ki ngā tikanga mō te tiaki i ngā tika o ngā kirirarau kia āhei atu ki ā rātau raraunga whaiaro me te mārama e pēhea ana te whakamahi
- te kauneke i te ture Pou Tarāwaho Pono a Ngā Ratonga Tuakiri Matihiko
- te whakatinana i te Tūtohinga Hātepe Papatono mō Aotearoa puta noa i te rāngai tūmatanui, me te hōpara i ngā whai wāhitanga hei whakatenatena kia nui ake te whakamahia
- te whakariterite i waenga i ngā whakahaere tūmatanui me te tūmataiti kia ako ai rātau mai i a rātau anō.
Ka hangaia e te Pou Tarāwaho Pono a Ngā Ratonga Tuakiri Matihiko i tētahi pou tarāwaho whakature mō ngā ratonga tuakiri matihiko. Ko te kaupapa o te tuakiri matihiko ko te whakatūturu tuihono i te tuakiri o te tangata. Otirā he mea nui ina hiahia tētahi kaiwhakarato ratonga matihiko ki te mōhio ko wai te tangata, te whakaū rānei i ngā mōhiohio mō tētahi tangata, pērā i ōna tohu. I whakaurua mai te Pire Pou Tarāwaho Pono a Ngā Ratonga Tuakiri Matihiko ki te Whare Pāremata i te Mahuru 2021.
I te wā i tuhia kei te kauneke haere mā ngā wāhanga ture. Ka āwhina ki te waihanga i ngā ratonga tuakiri matihiko pono, ā-tangata hoki.
Te whakamahi raraunga kia tika, kia matatika, kia pūrangiaho — He paiherenga pūmau — Mātai take: Te Tūtohinga Hātepe Papatono mō Aotearoa
He paiherenga te Tūtohinga Hātepe Papatono nā ngā tari kāwanatanga hei whakahaere i tā rātau whakamahi i ngā hātepe papatono kia tika, kia matatika, kia pūrangiaho.
Ka riro mā te tangata, kaua ngā rorohiko, e arotake me te whakatau i te nuinga o ngā whakatau hira a ngā tari kāwanatanga. Inā, kei te waihanga ngā tari i ngā hātepe papatono hou, he mea nui te mau tonu i te whakahaere ā-tangata tōtika me te whakarite ka āta whakaaroarohia ngā whakaaro o te hunga whai pānga hira, otirā te hunga ka whiwhi, ka whai wāhi rānei ki ngā ratonga.
Ka paiherea tūmatanuitia ngā tari waitohu ki te whakamahinga pūrangiaho me te takohanga o ngā hātepe papatono. Ka whakaae ēnei ratonga kia pūmau ki ngā tūmomo whakaritenga, tae atu ki te:
- whakamārama ka pēhea te whakamōhio a ngā hātepe papatono i ngā hātepe papatono
- whakarite kei te hāngai pū ngā raraunga mā te tautuhi me te whakahaere i te rītaha
- whakarite ka tiakina te tūmataiti, matatika me ngā tika tangata mā te arotake aropā haere tonu i ngā hātepe papatono
- whakaū i tētahi tirohanga ao Māori i roto i te whanaketanga me te whakamahinga o ngā hātepe papatono
- āta whakamārama i te wāhanga o te tangata i roto i ngā whakatau tikanga e whakamōhiotia ana e ngā hātepe papatono.
He pēhea te whai hua o ngā hapori o Aotearoa i te Tūtohinga Hātepe Papatono
Nā te Tūtohinga Hātepe Papatono mō Aotearoa i whakaaraara kia pai ake ngā tikanga puta noa i te ratonga tūmatanui o Aotearoa, ā, e whakaatu ana i te paiherenga pūmau o te kāwanatanga ki te whakamahi i ngā hātepe papatono mā tētahi tikanga tika, matatika hoki.
I tēnei wā e 27 ngā tari i roto o te rāngai tūmatanui o Aotearoa i waitohu i te Tūtohinga, tae atu ki te nuinga o ngā tari whakahaere nui.
Te ahuahu tahi i te anamata o ngā hangarau matihiko, ā-raraunga hoki
He tere te whanake haere o ngā hangarau matihiko me te āhua e whakamahia ana. Kei roto i ēnei huringa ko ngā whakaarohanga matatika me te ahurea, ngā mōrea me ētahi atu ara whakaea ka taea. Hei tauira, mā te whakamahi i te AI mō ngā utauta tātari hauora ka whakapai ake pea ngā whakataunga mate mō ētahi, engari ka kohia pea me te whakamahi i ētahi mōhiohio hauora atu anō mō te tangata.
Ka āwhina ngā hangarau matihiko ki te tiaki me te whakarei ake i te mātauranga Māori (pērā i te whakarauoranga o te reo Māori), engari ka taea anō te whakamōrea i te mātauranga. Me whakatau tātau he aha ngā hangarau matihiko kei te tika, kei te hāngai ki ō tātau uara. He nui ngā pūkenga o Aotearoa me ngā wheako mōhio kanorau. Ka pai ake ngā otinga mēnā ka whakatau tātau me pēhea te whakamahi i ngā hangarau matihiko, ā-raraunga hoki mā te mahi tahi me te hunga e pāngia ana ki ēnei.
Kei roto i ngā whai wāhitanga o ēnei tau e heke iho:
- ko te waihanga aratohu mō ngā raraunga mana whakahaere e whakaaronui ana ki ngā pānga o ngā iwi me te Māori
- ko te whakarongo ki ngā hapori kia mārama ai ki ō rātau manakohanga mō ngā hangarau me ngā raraunga matihiko
- ko te whakapakari i a tātau kia taea ai te hanga ngātahi me te ārahi ngātahi i ngā aronga mō te waihanga hangarau
- ko te tautoko haere tonu i ngā mahi ā-ao pērā i te Karanga a Ōtautahi hei whakarite i ngā taiao matihiko whakawhirinaki puta noa i te ao
- ko te kauneke haere tonu i te Rautaki AI mō Aotearoa me te Rūnanga AI.
- Kei te hangaia e te Rōpū Raraunga o Ngā Rangatira ā-Iwi me Tatauranga Aotearoa tētahi tauira mana whakahaere raraunga Māori mō ngā raraunga kāwanatanga. Ko te whāinga ko tētahi aronga ki te mana whakahaere raraunga e whakaata ana i ngā hiahia me ngā pānga raraunga a te Māori.
- I mahi tahi a Hīkina Whakatutuki (MBIE) me te Rūnanga AI ki te waihanga i ngā pou hei paihere i tētahi anamata Rautaki AI mō Aotearoa. Kei roto i tēnei ko te whāinga kia haumaru, kia matatika ngā auahatanga AI katoa me te whakatinanatanga puta noa i Aotearoa, me ngā tino tautoko me te pono o ngā tāngata katoa o Aotearoa.
Ngā aronga urutau ki te haumarutanga ipurangi, te haumaru tuihono me te pakari o te tūāhanga
He hira kia koreutu, tuwhera me te haumaru te ipurangi me te tūāhanga taketake pono kia haruru ai tētahi pāpori matihiko. Me mātua hāngai ā tātau tūāhanga whakawhitiwhitinga ki te kaupapa, ā, kia kaua e whakararua. Me mārama ngā pakihi me ngā whakahaere ki ngā mea me whakawhirinaki rātau, ā, me pēhea te whakapai ake i te haumaru me te haumarutanga o ā rātau pūnaha. Me kī ka taea e tātau te whakarite ngā whakamahinga kino o ngā hangarau matihiko, mai i ngā whakaekenga ipurangi ki te tuaritanga whānui o ngā kōrero parau.
Kei roto i ngā whai wāhitanga o ēnei tau e heke iho:
- ko te whai i tētahi aronga rautaki ake hei whakatika i ngā kōrero horihori, parau me ngā mōrea whai pānga
- ko te whakaoti i ngā wāhi matua o te rautaki haumarutanga ipurangi kia pai ake ai te haumarutanga mōhiohio me te pakari ā-motu
- ko te āwhina i ngā tāngata me ngā pakihi iti kia mārama ai he aha ngā momo ihirangi hei whakawhirinaki atu mā rātau e kitea ai e rātau ngā hītinihanga, tinihanga, tāware, ngā kōrero horihori me te parau
- ko te hanga i ngā tūāhanga whakawhitiwhitinga tōtika, anamata, pakari, tae atu ki ngā āheinga Kapua tino nui me te rokiroki raraunga.
- Kei te hangaia e Te Tari o te Pirimia me te Komiti Matua (DPMC) tētahi aronga hunga whai pānga maha hei urupare ki ngā kōrero horihori me te parau. Ko te whāinga ka hangaia he rautaki wā roa i te tau 2022. E whakaata ana tēnei aronga he wāhanga tō te kāwanatanga, te pāpori whānui, ngā kamupene hangarau, pāpāho, mātauranga, ngā pakihi me te iwi whānui ki te urupare ki te raru. Kei roto i ēnei tūranga ko te whakatipu i te mōhio ki ngā pānga o ngā kōrero horihori me te parau, te whakapuaki ina taea, me te whakakaha kia pakari.
- Kei te ārahi haere tonu te Rautaki Whakamaru Ipurangi o Aotearoa 2019 i te mahi a te kāwanatanga i te taha o te rāngai tūmataiti. Ko ngā wāhi matua ko te:
- whakarite kei te ngangahau, kei te mōhio hoki ngā tāngata ki te haumarutanga ipurangi
- hanga i tētahi ohu mahi haumarutanga ipurangi me te pūnaha rauropi kaha me te māia
- whakarite kia ngangahau, kia pakari, kia urupare a Aotearoa puta noa i te ao, ā,
- kakama ki te whakatūtaki i te taihara ipurangi.
Te tiaki i a Aotearoa mā Ngā Whatunga Kore Pūmanawa Kino — Mātai take: Ratonga Ngā Whatunga Kore Pūmanawa Kino
Me whai ngā whakahaere o Aotearoa i ngā mōhiotanga tuma ipurangi tere, ka taea te whakamahi hei āwhina i a rātau ki te tiaki i ā rātau kaimahi me te whakahaumaru i ngā ratonga e tukuna ana e rātau ki te iwi o Aotearoa. E whakaratoa ana tēnei e te Pokapū Haumarutanga Ipurangi ā-Motu (NCSC) mā tana ratonga Ngā Whatunga Kore Pūmanawa Kino (MFN).
He ratonga whakararu tuma a MFN e whakamaru ana i ngā whakahaere me te ārai i ngā tuma ipurangi ki ā rātau pūnaha IT me ngā whatunga tata tonu i te wā tūturu. E tautoko ana te MFN i ngā hua mōhiotanga tuma arumoni mā te whakararu i ngā tūtohu o ngā mahinga kino kua tautuhia mā ngā āheinga whakangungu ipurangi whatutoto a NCSC, ā, mai i ngā pātuitanga haumarutanga ipurangi ā-ao a NCSC.
Kei te whakahoa a NCSC ki ngā tūmomo kaiwhakarato hangarau puta noa i Aotearoa, hei whakarato i te ratonga MFN. Arā, mai i ngā kamupene whakawhitiwhitinga nui, ngā kaiwhakarato ratonga e whakahaerehia ana, mā ngā tikanga haumarutanga pokapū tauwhāiti. E tiria ana e NCSC ngā taipitopito hangarau o ‘ngā tūtohu o te whakamōrea’, mā ōna pātui mā ngā whakahaere kua whakauru mai, ā, kāore e tuku nama ki ngā ōna hoa pātui, kiritaki rānei kia uru ki te ratonga.
He pēhea te whai hua o ngā hapori o Aotearoa i te MFN
Mai i te whakarewa i te ratonga i te paunga o te tau 2021, kua whakararua, kua āraia kētia e te NCSC ngā tuma ipurangi neke atu i te 50,000 mā te ratonga MFN. Otirā, i āwhina te ratonga MFN ki te tiaki i ngā whakahaere mai i te whakaraerae Log4J i mua tonu o te Kirihimete 2021, ā, kei te whakawhanake haere tonu i te whakaurunga mai o ngā hoa pātui me ngā kiritaki ki te ratonga.
Mahi Tahi
Te whakarite kei te whakamanahia te katoa kia tōkeke te whakauru ki te pāpori matihiko.
Ngā Whāinga
- Kua whai utauta, pūkenga me te ngākau titikaha te iwi katoa o Aotearoa kia whai wāhi ki tētahi pāpori matihiko e tipu ana.
- E ū ana ngā tūāhanga matihiko, ngā ihirangi me ngā ratonga ki ngā hiahia kanorau o te tangata.
Ngā take matua
- He mea waiwai te whakauru ā-matihiko mō te whakauru ki ngā pāpori ā-iwi me ngā ōhanga, ā, he whakarato i ngā whai wāhitanga nunui hei hāpai i te ako, te auahatanga me te wairua auaha.
- Ko ētahi whakatau tata e kī ana atu ki te 1 i roto i te 5 tāngata o Aotearoa kāore e taea, kāore rānei i te hiahia, ki te whakauru tuihono. I kīia i roto i ngā whakawhitiwhiti kōrero tūmatanui i te hiku o te tau 2021, he nui ake te mōrea o ētahi hapori, hei tauira, te Māori, ngā iwi o Te Moananui-a-Kiwa, ngā kaumātua, te hunga hauā, mātāwaka hoki ki te aukatinga matihiko.
- Kia momoho, kia puāwai a Aotearoa, kei runga i te katoa kia:
- mārama me pēhea e āwhina ai ngā hangarau ipurangi me te matihiko i a rātau
- whai wāhi atu ki te tūhonohono me ngā pūrere tuihono utu ngāwari
- whai wāhi atu ki tētahi tūhononga ipurangi, ngā raraunga pūkoro rānei, ā, ka ngākau titikaha, ka haumaru te whakamahi i roto i ō rātau ao o ia rā
- whakawhanake i ngā pūkenga, ā, kia haumaru te whakamahi i ngā hangarau ipurangi me te matihiko mā ngā tikanga e tika ana ki a rātau.
- Ko te kāwanatanga anake te kaiwhakarato i ngā ratonga hira maha me ngā tukanga whakahaere e whakaahu ana i te āhua o te noho a te tangata. Me haumaru, me wātea, me punenga, ā, me pono ngā wāhi me ngā ratonga matihiko.
- Me mātua ū tātau ki ngā hiahia o te tangata mā ngā āhuatanga e tika ana ki a rātau. Ko te tikanga o tēnei ka whiwhi ngā tāngata i ngā ratonga pai rawa mai i ngā whakahaere hapori pono, kaua mai i te kāwanatanga ake.
Ngā kaupapa matua
He ine i te angitu atu ki te tau 2032, ā, ki tua atu
- Kei te iwi katoa o Aotearoa ngā utauta, ngā pūkenga me te ngākau titikaha ki te mahi i ngā mea e hiahia ana rātau i runga ipurangi.
- E wātea ana te ipurangi tino tere ki te iwi katoa o Aotearoa.
- Ka taea e ngā tāngata katoa o Aotearoa te utu tētahi tūhononga ipurangi kounga me tētahi pūrere ā-ipurangi.
Ngā mea e hiahia ana tātau
E hiahia ana tātau kia tōkeke, kia tuwhera ā-matihiko a Aotearoa. Kua tino whānui tonu te ao matihiko, ā, he pānga nui tō te whakaurunga matihiko mēnā ka taea e te tangata te whakauru mai ki ngā āhuatanga katoa o ia rā kia motuhake, kia āhua rangatira, kia ngākau titikaha hoki.
Ko te tikanga me hihiri, whai urunga, whai pūkenga, whai pono hoki te katoa ki te whakamahi i ngā utauta matihiko me ngā hangarau mā ngā tikanga e whaikiko ana ki a rātau. Kei roto i tēnei ko ngā ihirangi matihiko tuwhera me ngā ratonga ka taea e te tangata te whakamahi, ahakoa tō rātau ao me ō rātau kaha.
E 2 ngā whāinga o te kaupapa Mahi Tika:
- Kua whai utauta, pūkenga me te ngākau titikaha te iwi katoa o Aotearoa kia whakauru mai ki tētahi pāpori matihiko e tipu ana.
- E ū ana ngā tūāhanga matihiko, ngā ihirangi me ngā ratonga ki ngā hiahia kanorau o te tangata.
Kāore e tika te rahinga kotahi mō te katoa — ka rerekē pea ngā mea e hiahia ana tēnā tangata me tēnā whānau kia whakauru ā-matihiko ki ō rātau ao o ia rā. Engari, e mōhio ana tātau me whiwhi ngā tāngata katoa i tētahi pūrere matihiko tōtika, te urunga Ipurangi utu ngāwari, me ngā pūkenga matihiko taketake. E mōhio anō tātau he maha ngā tāngata he uaua ki a rātau te utu i ngā pūrere me te ipurangi. He mea nui te mōhio kia haumaru te whakatere ihirangi ipurangi me te whakarite i ngā tāware me ngā mōhiohio parau mō te whakaū i te ngākau titikaha ki tō tātau pāpori matihiko.
He mea nui ki a mātau kia whakaarahia hei kaupapa matua te utu ngāwari o ngā hangarau mā te hunga o te hapori hauā. He tauārai nui pea te utu o ēnei hangarau ki te ekenga o Aotearoa hei pāpori whakaurunga matihiko whānui.
Engari, kāore e nui te pūrere matihiko tūhono mō te tangata. Hei tauira, kāore e taea ētahi paetukutuku me ētahi ratonga matihiko. I tua atu i tēnei, me whai te tangata i ngā pūkenga me te kaha ki te whakatere i te taiao tuihono, engari kāore pea i ētahi tāngata noho mōrea te mōhio ki te pānui, te aroā hoki mō te ipurangi, otirā mēnā ehara ko te reo Ingarihi tō rātau reo tuatahi.
Ka taea te whakamahi ngā pae pāpāho pāpori hei papa whakaputa kōrero horihori, parau me ngā tuma kirimuna. Me mātua whakarite ngā pakihi me ngā whakahaere kei te haumaru ā rātau ratonga, wāhi me ngā ihirangi matihiko, ā, ka taea e te katoa.
Ehara i te mea me matihiko ngā mea katoa
Ahakoa e whai ana tēnei Rautaki ki te para i te huarahi mō Aotearoa kia noho hei whenua matihiko tiketike i te ao, ehara i te mea me matihiko ngā wāhanga katoa o ō tātau ao. I te nuinga o te wā, he mea hira tonu ngā whakawhitiwhiti kanohi ki te kanohi mō te tuitui taura here me te whiwhi i ngā mōhiohio pono. Kāore e taea, e kore rawa rānei ētahi tāngata e whakamahi ratonga matihiko. Me mātua whakarite tātau ka taea anō e rātau ngā ratonga e hiahiatia ana e rātau.
Tē taea e tātau te tirotiro te whakaurunga matihiko i waho o ētahi atu hiahia, whakaritenga e whakaawe ana i te rawakore me te kore ōrite. Nā ngā rahinga moni whiwhi ka pā ki te Māori kāore e ea i te Māori ngā tūhononga.
Ko ngā kaupapa hei whakarite i te aukatinga matihiko me mātua ū ki ngā hiahia o te tangata mā ngā āhuatanga e tika ana ki a rātau. I ētahi āhuatanga me nui ake pea ngā tautoko mō ngā kaupapa hāngai ake i takea mai i ngā pūkenga tauwhāiti, arā, pērā i te hauātanga.
I ētahi atu āhuatanga, ko te tikanga pea ka whiwhi ngā tāngata i ngā ratonga pai rawa mai i ngā whakahaere hapori pono, kaua mai i te kāwanatanga ake. Hei tauira, i te mea neke atu i te 80% ngā tāngata o Te Moananui-a-Kiwa e hono ana ki tētahi hapori hāhi, tērā pea ko ngā hāhi tētahi ara kōrerorero hira, pouhere hoki mō ngā kaupapa whakaurunga matihiko.
Pūrongo: Ngā kitenga kaiwhakamahi mahi tahi matihiko—Nga iwi o Te Moananui-a-Kiwa
E 4 ngā huānga o te whakaurunga matihiko
Kei roto i te whakaurunga matihiko ko ngā huānga e 4:
He aha ngā mea e hiahiatia kia whakauru ā-matihiko — Ko te Mahere Whakaurunga Matihiko
Ngā wāhi arotahi: Mahi Tahi
Me whiwhi tātau i ngā whai wāhitanga tino nui kia pai ake te whakahihiri, te urunga, ngā pūkenga me te pono.
Ka taea te whakatere ake te whakaurunga matihiko mā te:
- waihanga i ngā aronga hāngai, ā-hapori kia pai ake te whakaurunga matihiko
- whakarite kei te ū ngā ihirangi me ngā ratonga matihiko ki ngā hiahia o te katoa
- pai ake o te ine i te whakaurunga matihiko me te whakapai ake i te whakarite me te whakahāngai i ngā tautoko.
Ngā aronga hāngai, ā-hapori kia pai ake te whakaurunga matihiko
He rerekē pea ngā pūtake o tēnā hapori me tēnā whānau mō te kore whakauru matihiko ki te pāpori. Kāore e whaitake te aronga ‘kotahi te rahinga mō te katoa’. Me mātua mahi tahi te kāwanatanga me ngā pātui hapori pono, e āhukahuka ana i tō rātau wāhanga mō te whaitake o te whakapiki haere tonu i te whakaurunga mō te wā roa. E mōhio ana ngā hapori ki ō rātau hiahia, ā, i te nuinga o te wā kei te wāhi tika rātau ki te tuku tautoko. He wāhanga hira tonu tō ngā takawaenga pērā i ngā whare pukapuka me ngā whakahaere kāwanatanga-kore mō te whakapai ake i te whakaurunga matihiko.
Ka nui ake te tūpono ka aukatia ētahi rōpū mai i te ao matihiko, ā, me mātua arotahi tātau ki te whakapai ake i te āhei atu mō aua rōpū. Hei tauira, nā te uaua o te toro i te tangata i ngā wāhi tuawhenua, mamao hoki e iti iho te tangata, ā, kei ngā whenua uaua hoki ka nui te utu o te tūhonohono i te tuawhenua. I whakatauria e te pūrongo a te 2021 KPMG Agribusiness Agenda ko te aunui tuawhenua tere, wātea ki te katoa te kaupapa matua tuatoru i muri i te haumaru-koiora me ngā whakaaetanga tauhokohoko kounga.
Pūrongo a te 2021 Agribusiness Agenda — KPMG New Zealand
Ko ērā atu rōpū e tino noho mōrea ana ki te aukatinga ko ngā kaumātua, te iwi Māori me Te Moananui-a-Kiwa, te hunga hauā, te hunga whai tamariki me te noho i ngā hapori ohapori rawakore, te hunga kore mahi, iti te mahi rānei, me te hunga hara, hunga hara o mua rānei. Ka tino nui ake pea te mōrea o te aukatinga i te pūtahitanga o ēnei rōpū.
Kei roto i ngā whai wāhitanga o ēnei tau e heke iho:
- ko te hanga me te kauneke haere tonu i ēnei kaupapa e ū ana ki ngā hiahia tauwhāiti o ngā hapori me ngā rōpū e tino hiahia i ēnei
- ko ngā kaupapa tuku pūtea e turaki ana i ngā tauārai ki te whakaurunga matihiko, me te whakarahi ake i aua kaupapa, whakahāngai rānei i ēnei mō ētahi atu hapori mēnā ka angitu
- ko te ārahi me te hanga ngātahi a ngā hapori i ngā kaupapa hei whakarite i te whakaurunga matihiko
- ko te whakarite kua whai tūhononga ngā rohe katoa, tae atu ki ngā wāhi tuawhenua me te mamao, e tutuki ai ngā hiahia o te tangata me ngā pakihi, ināianei me ā muri ake
- kia whaitake ake te whakarite me te whakahāngai i ngā mahi a te kāwanatanga ki te whakapai ake i te whakaurunga matihiko me te kauneke i tētahi Rautaki mō tētahi Rāngai Tūmatanui Matihiko.
I whakapaua e Te Tari Taiwhenua te $10 miriona ki ngā whakangungu pūkenga matihiko mā ngā tāngata me ngā whānau mā te Manaiakalani Education Trust. E aro ana te kaupapa ki ngā ākonga pūhou me ō rātau whānau ki te whakapai ake i ā rātau akoranga me te hāpai i ngā hapori. Ko te Pūtea Urupare me te Whakarauora KOWHEORI-19 kei te utu i ēnei mahi.
E utua ana e te Ethnic Communities Digital Inclusion Fund ngā kaupapa e āwhina ana i ngā hapori mātāwaka ki te whakamahi hangarau hei tino whakauru ki te iwi whānui. Ka whakaratoa e ngā kaupapa e utua ana ngā kaupapa ā-ahurea e hāpai ana i ngā hiahia o ngā rōpū rerekē. I tukuna e te rauna pūtea 2021 te $200,000 ki ngā kaupapa hapori 12.
I mahi tahi te kāwanatanga me ngā kaiwhakahaere whatunga tūmataiti ki te whakapaipai ake i te tūāhanga whitimamao o Aotearoa. Ka whakarite tēnei ka whai wāhi atu te tangata ki te aunui tino kounga i ngā utu tōtika.
Ko te hiranga ake o te tūhonohono tuawhenua te take, i roto i ēnei tau 10, atu ki te Tahua 2022, kua nui atu i te rua whakareanga ake te nui o te pūtea kua tukuna e te kāwanatanga mō ia tangata o te taupori hei whakapai ake i te tūhonohono i ngā wāhi tuawhenua tēnā i ngā wāhi tāone.
Ko ētahi o ngā kaupapa tūhonohono nui a te kāwanatanga i tēnei ko te:
- kaupapa Ultrafast Broadband (UFB) $1.9 piriona, ā, neke atu i te 86% te taupori kei te āhei atu ki te aunui
- neke atu i te $600 miriona te nui kua whakapau ki Ngā Kaupapa Aunui Tuawhenua 1 me te 2 (RBI1 me te RBI2), Mobile Black Spots Fund (MBSF) me Rural Capacity Upgrades (RCU). Nā tēnei kua pai ake te aunui mō ngā kāinga me ngā pakihi tuwhenua neke atu i te 372,000, te whakarato hōkaitanga pūkoro mō te 984 km o te huarahi matua me ngā wāhi tūruhi 86, i hangaia ngā pourewa hou neke atu i te 330, me te whakapaipai i te 70 atu anō
- tūhono a te kaupapa Ngā Whatunga Iahiko a ngā Marae i ngā marae neke atu i te 560 i te aunui.
Kei roto a Aotearoa i ngā whenua OECD matua e 5 mō te tuku kaka kaweaho ki te iwi. Ina oti ngā kaupapa onāianei i te 2023, 99.8% o te taupori ka āhei atu ki te aunui ahakoa kei hea rātau e noho ana. Kia mau ai tēnei, me whakatipu haere tonu tātau i ā tātau whatunga whitimamao me te noho hāngai tonu ki te kaupapa i te mea he nui atu ngā tāngata kei te hiahia whakamahi i ērā mō ngā wā nui atu. Ka arotahi tonu te kāwanatanga me te ahumahi ki te tuku kia nui ake atu te iwi Aotearoa e āhei atu ki te tūhonohono e hiahia ana rātau i te wāhi e noho ana, e mahi ana, e ako ana rātau.
Te whai i te ‘rāngai pakihi iti tino matihiko rawa i te ao’ — Mātai take: Digital Boost
He uaratanga tā te kāwanatanga kia whai a Aotearoa i te rāngai pakihi iti rawa tino matihiko i te ao. E tautoko ana a Digital Boost i ngā rangatira pakihi iti kia takahuritia matihikotia ā rātau tauira whakahaere, kaua mā te whakamana anake i te pūmanawa mārō matihiko anake me te pūmanawa rorohiko, engari mā ngā huringa ki ngā tukanga, ngā pūkenga hou, ngā āheinga, me te tirohanga hōhonu ake ki ā rātau pakihi mā ngā raraunga.
E tautoko ana a Digital Boost Educate i ngā rangatira pakihi iti, te tuku pūkenga matihiko koreutu, tere whaiaro mā ngā kōwae ataata i hangaia mō ngā kōwae tauhou ki te ao matihiko tae noa ki ngā mea whatutoto ake. He hongere ako whaiaro tēnei e kapi ai ngā mea katoa mai i te pāpāho pāpori tae noa ki te tāpiri utunga ki tō paetukutuku. Ka noho ko ngā kōrero ao tūturu hei mātai take ataata hōhonu mō ngā rangatira pakihi iti kia kite ai i pēhea te takahuri ā-matihiko a ētahi atu i tā rātau pakihi.
Ko te utauta hou rawa ko te Digital Boost Checkable, he utauta tātaritanga matihiko kaha koreutu. He whakahaere i tētahi arotake āmiki o te wāhanga matihiko o tētahi rangatira pakihi me te tuku i tētahi mahere whakaraupapa o ngā mahi hei whakatika, ā, me pēhea.
Digital Boost Checkable — Digital Boost
He pēhea te whai hua o ngā hapori o Aotearoa i te Digital Boost
Ko ngā pakihi iti te manawa o ngā hapori. Ka pai ake te tautoko a ngā pakihi pakari ake i ō tātau hapori me te hāpai kia ora tonu rātau i roto i ngā whakararutanga. I kitea i te Noho Rāhui KOWHEORI-19 i te tau 2020 ko ngā pakihi iti i whakamahi i ngā taupānga matihiko e 5, neke atu rānei, he hautoru te iti iho o te heke o te moni puta me te 40% te iti iho o te rironga o ngā mahi.
Ka tautoko a Digital Boost i ngā pakihi iti mano tini kia kite ai rātau i ngā painga o te whakamahi i ngā utauta me ngā hangarau i roto i ā rātau pakihi, e taea ai e rātau te whakapiki i ō rātau pūkenga matihiko me te hanga i ngā tauira whakahaere pakari ake ki ngā whakararu me ngā huringa.
I āwhina a Digital Boost i ahau, kaua ā-ngaio nei engari ahau ake. Ko te mea i tino kukume i ahau, ko au tonu, i titiro mai ki ahau. Ngā tāngata noa o Aotearoa tonu i tuhi i tētahi pakihi hukihuki mai i te kore. Mai i te tīmata i te Digital Boost kua tino tipu [taku pakihi], nui atu i ngā marama e 3 kua hipa tēnā i ngā tau e 3 kua hipa.
Te whakarite kei te ū ngā ratonga me ngā ihirangi matihiko ki ngā hiahia o te katoa
Me whai whakaaro tātau ki ngā tūmomo hiahia whānui me ngā wheako ake ina hoahoa ana i ngā ihirangi me ngā ratonga matihiko. Ko tētahi wāhanga hira o te whakaurunga matihiko ko te whakatapoko — te whakarite kāore he ārai i te hunga e whakamahi ana i ngā ihirangi me ngā ratonga matihiko.
Ko te āhei atu tētahi mea hira mō te hunga hauā, engari i te mutunga ka whai hua te katoa. He paerewa tonu tō te whakatapoko me ngā tikanga mau roa, engari me kaha ake tātau ki te whakatinana i ērā. Me mātua hoahoa e tātau ngā ratonga matihiko kia ū ai ki ngā hiahia kanorau me ngā manakohanga o ngā kaiwhakamahi, me te mōhio he mea nui tonu ki ētahi tāngata ngā otinga matihiko-kore.
Kei roto i ngā whai wāhitanga o ēnei tau e heke iho:
- ko te tautoko i ngā tari kāwanatanga ki te whakamahi i ngā tikanga pai rawa ina hanga me te whakahaere i ngā ratonga kāwanatanga, tae atu ki te whakatinana i ngā mātāpono hoahoa ahuwhānui, Ngā Paerewa Tukutuku a te Kāwanatanga me te Paerewa Hoahoa Ratonga Matihiko a te Kāwanatanga
- ko te mahi me ngā tari me ngā kaitaunaki kāwanatanga-kore hei āwhina ki te whakatika i ngā raru o te wehewehe matihiko mō ngā rōpū e noho mōrea ana ki te aukatinga matihiko
- ko te whakaatu ki ngā pakihi me ngā whakahaere kāwanatanga-kore te uara o te tuku i ngā ihirangi me ngā ratonga tino whakatapoko
- ko te whakarite he whaitake, whakamana, matihiko-kore te āhei atu ki ngā tari kāwanatanga
- ko te waihanga, te whakarato i ngā utauta me ngā otinga mō ngā tari kāwanatanga hei whakarato i ngā ratonga matihiko tuwhera.
E whai ana te kaupapa Ngā Aratohu Whakatapoko Tukutuku i te whakatapoko puta noa i te rāngai tūmatanui me te hapori tukutuku o Aotearoa. Ko te whāinga matua he whakapai ake i te whakatapoko o ngā mōhiohio me ngā ratonga tuihono a te kāwanatanga. Ka whakaputaina te aratohu whakamutunga ki Digital.govt.nz hei te 2022.
Te whakangungu i te mōhio ā-matihiko mā ngā kaumātua — Mātai take: Te Tari Kaumātua
Kei te ārahi Te Tari Kaumātua i tētahi kaupapa whakangungu mōhio ā-matihiko toa o te ao hei tautoko i ngā kaumātua ki te uru ki te ipurangi me te whakahaere haumaru i ngā tauwhitinga tuihono i runga i te pono me te ngākau titikaha.
He nui tonu ngā kaumātua e kaupare haeretia ana ā-matihiko i te hekenga haere o tā rātau uru ki te ipurangi me te whakamahi, tae atu ki te pono me te ngākau titikaha, i tō rātau pakeke haere. Kei te nui haere te maha o te hunga 65 tau, neke atu, ā, ka pēnei haere tonu āhua.
I tēnei wā, e 6 ngā kaiwhakarato i waitohu i tētahi whakaaetanga me Te Tari Kaumātua hei hanga i tētahi Rōpū Mahi Whakaurunga Matihiko mō Ngā Kaumātua kia mahi tahi ki te whakawhānui haere i te totoro, te pānga, te kounga me te ōrite o ngā kaupapa whakangungu mōhio ā-matihiko mō ngā kaumātua.
Kei te whakamahia e rātau tētahi pou tarāwaho Mōhio ā-Matihiko Waiwai / Ngā Pūkenga (EDS) hei tātari i te whaitake me te kounga o ngā kaupapa whakangungu mōhio ā-matihiko mō ngā kaumatua me te tuku i tētahi taumata paerewa o ngā putanga whakangungu mōhio a-matihiko me ngā inenga. E whakaatu ana ngā otinga arotake wā poto ko te hunga i whai wāhi ki te akoranga whakangungu i whiwhi pūkenga me te ngākau titikaha mō te ipurangi.
Ngā painga o te whakangungu
Mā te tautoko i ngā kaumātua kia whakauru matihiko mai ka āwhina i a rātau kia kounga ake tō rātau ao i tō rātau pakeketanga. He āwhina hoki i ngā tari kāwanatanga me ngā pakihi ki te whakatutuki i ā rātau haumitanga ki te hangarau me ngā pūhara tuihono me ngā ratonga i te mea ka nui ake te hunga ka taea te whakamahi tuihono ā rātau ratonga.
I whakauru mai te kaihaumanu nekeneke o mua a Claire, 70 ōna tau, i muri i tana whiwhi i tētahi īPapa:
He nui ngā mea kua ako ahau, hei tauira, kua mōhio au ināianei ki te kite i ngā tāware ināianei. Ka rawe ki ahau te hopu whakaahua o ngā tāngata o ia rā, nō reira he mea nui te mōhio me pēhea te rokiroki — me te kimi anō. Kua ako anō ahau me pēhea te muku atahanga, me te rerekētanga i waenga i te tukuatu me te tikiake.
I kī anō a Claire he kaha ake tōna wairua mātātoa, ā, kua kore e tino mataku ina whakamahi ana i te hangarau.
Me pai ake te ine i te whakaurunga matihiko me te whakapai ake i te whakarite me te whakahāngai i ngā tautoko
I tino mārama te rongo i roto i ngā kōrerorero tahi me mea waiwai te whai i tētahi inenga tauwhāiti, āmiki, whaitake hoki o te whakaurunga matihiko i Aotearoa.
He mana ngā whakahaere puta noa i te motu kei te ārahi i ngā kaupapa e hāpai ana i te whakaurunga matihiko. Me pai ake te whakariterite puta noa i ngā kaupapa me waenga i ngā whakahaere — tae atu ki ngā tari kāwanatanga. Ka āwhina tēnei i te tangata e mahi ana i te whakaurunga matihiko ki te tuari i ō rātau wheako me te whakarahi ake, tārua, urutau rānei i ngā aronga angitu ina tika ana.
Ko ētahi o ngā whai wāhitanga kei tēnei wāhi:
- ko te whakatairanga me te whakawhānui pea i ngā kaupapa whakaurunga matihiko onāianei e pai ana te mahi
- ko te whakaoti i te waihanga i tētahi pou tarāwaho pūkenga matihiko ā-motu mō Aotearoa
- kia mārama ake ki te āhua o te whai i te matihiko me te whakaurunga mō ngā rōpū rerekē, ā, he aha ngā raraunga me whai mō te whakapaitanga
- ko te āta mārama me te ine i te uara pāpori whānui me te ōhanga o te whakaurunga matihiko
- ko te ine haere tonu i te whakaurunga matihiko me te whakarite ka whai raraunga tōtika tātau kia mārama ai ki ngā huringa mō ngā rōpū rerekē i roto i te wā
- ko te whakatenatena me te āwhina i ngā whakahaere kei roto i te whakapai ake i te whakaurunga matihiko hei tuari i ngā tikanga pai rawa
- ko te whakatū i tētahi Kaiārahi Whakaurunga Matihiko hei āwhina ki te whakariterite me te whakahaere i te haumi me ngā mahi a te kāwanatanga mō te whakapai ake i te whakaurunga matihiko.
Kei te hangaia e Te Tari Taiwhenua tētahi pou tarāwaho pūkenga matihiko ā-motu mō Aotearoa. Ka whakarato tēnei i tētahi paerewa ōrite ā-motu me te whakauru i ngā whāinga mō te mōhio ā-matihiko, te whakaurunga matihiko me ngā pūkenga matihiko i ngā taumata rerekē.
Ka taea e ngā kaiwhakarato me ngā tari o rōpū kē te whakamahi tēnei pou tarāwaho hei ārahi i ā rātau kaupapa whakangungu pūkenga matihiko, me te āwhina kia ōrite, kia inea, kia tauritea ngā otinga. Ka āhukahuka anō te pou tarāwaho me hāngai ngā kaupapa ki ngā hapori tauwhāiti.
Mahi Ake
Te whakarewa i a Aotearoa ki tētahi anamata ā-matihiko whaihua atu.
Ngā Whāinga
- Ka auaha ā tātau pakihi, whakahaere hoki me te whakapiki i te whakaputaranga mā ngā hangarau matihiko me ngā raraunga.
- He momoho, he tere te tipu, he tuwhera tō tātau rāngai hangarau.
Ngā take matua
- Ka whakarato ngā hangarau matihiko, ā-raraunga hoki i ngā whai wāhitanga nunui hei whakatipu i te ōhanga o Aotearoa mā ngā āhuatanga tōkeke, toitū, tiketike i te ao. Ka whakarato ēnei i ngā āhuatanga hei auaha me te whakapiki i te whakaputaranga, i roto i ngā rāngai katoa o te ōhanga, tae atu ki te hauora me ētahi atu ratonga tūmatanui. Ka whakarato anō ēnei i ngā whai wāhitanga mō te auaha, te tipu me ngā mahi hei rāngai akiaki tonu.
- Kei te nui haere tonu te takoha a te rāngai hangarau matihiko, ā, i puta te $6.6 piriona o te moni whiwhi hoko whakawaho i te tau 2019 me te tautoko i ngā mahi neke atu i te 38,000. Ko te āhei atu ki ngā pūkenga tētahi whakapātaritari pūmau, ā, ka puta i tēnei tono ngā whai wāhitanga hei whakatenatena kia nui ake ngā tāngata o Aotearoa e whakauru ana ki te rāngai me te whaihua mai i ana tūmanako.
- Mā te whakarite kei te hanga haere tonu ngā pakihi me ngā whakahaere o Aotearoa katoa i tō rātau kaha matihiko ka puta ake ngā pānga pai ake mō te ōhanga, ngā pakihi me ā rātau kiritaki. Ka pakari ake ngā pakihi me te arotahi ki te anamata. He mea nui kia tautokona ngā kaimahi i roto i tēnei takahuritanga, otirā mā te whakangungu me te whakapakari pūkenga.
- Ka āwhina te tauhokohoko matihiko me te hoko whakawaho i ngā ratonga ki te turaki i ngā tauārai tuku iho o te tawhiti, e whakatuwhera mai ana i ngā whai wāhitanga nui atu ki ngā pakihi o Aotearoa ki te hokohoko ki ngā mākete nui o te ao.
- Me pakari, whaitake te tūāhanga whakawhitiwhiti me te tuwhera ki ngā raraunga, ina tika ana, hei whakamahi mā ngā tāngata me ngā pakihi.
- Ko ētahi atu mōrea me whakahaere ko te tuku i ngā mahi uara iti noa ki ngā kaimahi i tāwāhi he iti iho ngā whakamarutanga mahi, te kore whai whakaaro ki ngā pānga taiao, me te kore tōkeke o te tuari o ngā painga pūtea o te tipu o te ahumahi.
Ngā kaupapa matua
Ngā inenga o te angitu atu ki te 2032, ā, ki tua atu
- Kei te anga whakamua ngā hoko whakawaho matihiko me ngā ICT hei kaiwhiwhi hoko whakawaho matua mō Aotearoa.
- Ka whānau mai ngā pakihi katoa o Aotearoa kia matihiko, ā, e tautokona ana ki te whai i ngā utauta matihiko e whaikiko ana ki a rātau.
- Neke atu i te 10% o te ohu mahi o Aotearoa kei te rāngai matihiko i roto i ngā mahi uara teitei.
Ngā mea e hiahia ana tātau
Ko te hiahia kia riro mā te auahatanga matihiko hei kōkiri i te tipuranga puta noa i ngā momo pakihi me ngā whakahaere katoa i Aotearoa. Ko te hiahia anō kia hira te wāhanga o te rāngai hangarau mō te hanga i tētahi anamata tōkeke ake, waro-iti.
Kei roto i te kaupapa Mahi Ake ko ngā whāinga e 2 hei āwhina i a mātau kia taea ai te tipuranga tuwhera, ukauka:
- Ka auaha ngā pakihi, whakahaere hoki me te whakapiki i te whakaputaranga mā ngā hangarau matihiko me ngā raraunga.
- He momoho, he tere te tipu, he tuwhera te rāngai hangarau.
Hei whakatutuki i te pūmanawa noho puku o ngā raraunga me ngā hangarau matihiko hei whakatipu i te ōhanga me te whakanui ake i te whakaputaranga, me mātua whai matihiko ngā pakihi me ngā whakahaere mā te tūāhanga whakawhitiwhiti pakari.
E paihere kē ana ngā hangarau matihiko i ngā rangatōpū nui me ētahi atu whakahaere i Aotearoa, engari kei reira tētahi whai wāhitanga mō ētahi pakihi atu anō ki te whai utauta matihiko hei whakahaere tukanga, te whakapiki i te tōtikatanga, me te tauhokohoko me te hoko whakawaho i ā rātau rawa me ā rātau ratonga, tae atu ki te tauhokohoko matihiko.
Ina hāpaina e ngā pakihi me ngā whakahaere puta noa i ngā rāngai katoa te maha o ngā hangarau ā-raraunga, ka taea te whakaoti ngā rongoā tino uaua — mai i te whakapai ake i ngā hua mā ngā mīhini hei whakamahi i ngā akoranga mīhini mō te āhukahuka kōrero i te reo Māori — me te hanga i ngā hua me ngā ratonga auaha hou e whakarato ana i ō rātau hapori, te whakapiki i ngā hoko whakawaho me te whakatipu i te ōhanga.
Hei whakarite ka whakawhiti a Aotearoa ki tētahi anamata waro-iti momoho me te whaihua, me whai tautoko te rāngai hangarau kia tipu ai ki te ahunga mārama me tētahi ara pūmanawa kanorau. Me whai tautoko anō tō tātau ara pūmanawa mai i ngā pūmanawa taumata tiketike puta noa i te ao. Mā tētahi ahunga mārama me tētahi mahere pūmau, ka taea e tēnei rāngai te hāpai tētahi ōwehenga nui ake o te hua whakanaonga tapeke ki uta o Aotearoa (GDP) me te awhina ki te whakapūmau i tētahi ōhanga kanorau me te pakari.
He mea waiwai te hekenga mō tētahi ahumahi pūkenga tiketike pērā i te hangarau, engari tē taea te mau tonu ki ngā taumata onāianei — neke atu i te 50% o ngā tūranga hou he mea whakakī i te hekenga.[Footnote 4] Ko ētahi atu ahumahi pūkenga tiketike kei te 20 ki te 25% e haere ana. Me haumi te ahumahi ki te whanaketanga pūkenga ā-motu, kaua rātau e pōhēhē ka taea tonu e rātau te hoko pūkenga mai. Me tautoko te kāwanatanga i ngā kaupapa me te āwhina ki te kōkiri i ngā huringa, ā, me tautoko te rāngai mātauranga i tēnei takahuritanga.
Ngā wāhi arotahi: Mahi Ake
Hei whakarite ka tautokona e ngā hangarau matihiko, ā-raraunga hoki i te tipuranga tōkeke, toitū hoki mō Aotearoa, me mātua whakatenatena tātau i te auahatanga, te haumi tōkeke, me te waihanga i tētahi puna pūmanawa kanorau wā roa. Kia tutuki ai tēnei, me mātua pūnoke te mahi tahi a te rāngai tūmatanui, te rāngai tūmataiti me ngā hapori me te arotahi ki te anamata.
Ka taea e tātau te whakarite ka tipu mā te:
- whakatipu i te kaha matihiko me tētahi puna pūmanawa kaha me te kanorau
- tautoko i te auahatanga Māori
- tautoko i te auahatanga ā-raraunga.
Te whakatipu i te kaha matihiko me tētahi ara pūmanawa kaha me te kanorau
He hira ngā pakihi me ngā whakahaere o Aotearoa whai kaha matihiko me te āhei atu ki ngā kaimahi whai pūkenga ki te anamata matihiko o Aotearoa. He maha ngā kaupapa kua tīmata kē ki te tautoko i ngā pakihi iti hei whakamana i ngā utauta matihiko me ngā raraunga. Kei te tino pakari haere ā tātau pūnaha rauropi haumitanga auahatanga me te hangarau.
Ko te whai pūmanawa tonu tētahi whakapātaritari, ā, kua kitea e te mate urutā KOWHEORI-19 te hiahia ki te whakatipu i tētahi puna pūmanawa pakari me te kanorau i konei i Aotearoa. Kei roto i tēnei ko te hanga i ngā ara mahi mārama me te tuwhera mō ngā tāngata katoa o Aotearoa, tae atu ki te iwi Māori me Te Moananui-a-Kiwa, ngā wāhine me ngā rangatahi, me te whakamana haere tonu i te whakapiki pūkenga, otirā mō ngā kaumātua e takahuri nei ā rātau tūmahi nā te hangarau hurihuri.
Kei roto i ngā whai wāhitanga o ēnei tau e heke iho:
- ko te tautoko haere tonu i te kaha me te auahatanga matihiko i ngā umanga iti me te wawaenga (ngā SME), tae atu ki te whakakaha i ngā pūkenga matihiko arowhānui o ngā kaimahi
- ko te whakariterite i ngā ture tauhokohoko matihiko kia tika ake ai, kia māmā ake ai mō ngā pakihi me ngā kiritaki o Aotearoa ki te whakauru ki te tauhokohoko matihiko ao whānui. Me mātua whakahōnore ngā ture i Te Tiriti o Waitangi me ōna mātāpono, me te tiaki i tō tātau kaha ki te urupare ki ngā whakapātaritari me ngā whai wāhitanga
- ko te whakatinana i te Mahere Takahuritanga Ahumahi Hangarau Matihiko me te whakatau i tētahi aronga ngātahi hei waihanga i te whanaketanga pūkenga me te whai pūmanawa mai i tāwāhi. Ka whakarite tēnei kei te whai tāngata tika tātau i tēnei wā, ā, kei te whakapakari i ngā pūkenga tika me te taiao mō tētahi rāngai kanorau ā tōna wā
- te whakawhānui i te ingoa pono o Aotearoa me te whakatipu i tō tātau wāhanga i te ao i ngā wāhi pērā i te haumarutanga ipurangi me ngā rongoā tūmataitinga
- te awhina i ngā whakahaere kia haumaru, kia wairua tuwhera ō rātau wāhi mahi mō ngā tāngata me ngā tūmomo wheako noho whānui.
Te āwhina ki te whakatau i ngā ture hou mō te tauhokohoko matihiko tuwhera — Mātai take: Whakaaetanga Pātuitanga Ōhanga Matihiko
Kei te takahuri te hangarau matihiko i te āhua o tā tātau noho, whakahaere pakihi rānei, engari kāore i ū ngā ture, tikanga hoki i ngā tauhokohoko aowhānui ki ēnei huringa.
Kei te mahi tahi a Aotearoa, a Hingapoa me Hire ki te tautoko me te kauneke i te tauhokohoko i te ao matihiko mā te Whakaaetanga Pātuitanga Ōhanga Matihiko (DEPA).
Ka āwhina te DEPA ki te whakatū i ngā ture hou me ngā tikanga mō te tauhokohoko matihiko, me te whakatairanga i ngā kōrerorero haere tonu mō ngā take pērā i te whakaurunga matihiko, te tauhokohoko matihiko tuwhera me ngā tautoko mō ngā umanga iti me te wawaenga (ngā SME) i roto i te ōhanga matihiko.
E kapi ana i te whakaaetanga ngā wāhi whānui, mai i te whakakaha i ngā ture takawaenga tauhokohoko pērā i te tuku ī-nama, ī-utu me te tauhokohoko kore pepa, te hanga i te whakamaru kiritaki me te pono, me te mahi tahi mō ngā take e ara ake ana pērā i te AI me FinTech. He mea hanga te DEPA kia whakahāngai i te aratanga mai o ngā whai wāhitanga matihiko me te mahi hei kairapu ara mō ngā mahi tauhokohoko matihiko i ētahi atu rūnanga ā-ao pērā i te WTO me te Asia-Pacific Economic Cooperation (APEC).
Te take he mea nui tēnei
He wāhanga hira tō ngā SME i te ōhanga matihiko o Aotearoa. I Aotearoa 97% o ngā pakihi he iti iho i te 20 ngā kaimahi. He rerekē ngā whakapātaritari kei mua i ngā SME ki ngā pakihi nui. Ka āwhina ngā DEPA i ngā SME kia whaihua i ngā whai wāhitanga i ngā mākete o te ao me te whakarite kei reira ngā whakamaru mō te whakamaru i ngā mea pērā i ngā mōhiohio whaiaro.
Kei roto anō i te DEPA ko ngā whai wāhitanga mō ngā SME o Aotearoa hei tūhono ki ngā SME mai i ētahi atu rōpū DEPA. Ka mahi anō te DEPA ki te whakamaru i ngā tika kiritaki tuihono me ngā pānga, tae atu ki te whakamaru i ngā pakihi me ngā kiritaki mai i te pāme. E mōhio anō te DEPA kei te tere te whanake haere o te ōhanga matihiko, ā, me mau tonu i aua ōhanga te tika ki te whakature mō te painga o te iwi whānui i tēnei wāhi.
Ka pēhea te āhua o te angitu
I tōna iho, he mea hanga te DEPA kia māmā ake te tauhokohoko tuihono, ka haumaru ake, ka tuwhera ake mō ngā pakihi me ngā kiritaki. Arā, ko tētahi ine hira o te angitu ka nui ake ngā SME me ngā kiritaki e whakauru mai ana me te momoho ki te ōhanga matihiko ao whānui. He tūtohu hira anō o te angitu te whakapikinga o ngā hoko whakawaho matihiko puta noa i Aotearoa.
Ko te kaupapa anō o te DEPA he tūāpapa, para rānei i te huarahi mō ētahi atu whakaaetanga tauhokohoko matihiko ā-ao, i waenga hoki i ngā whenua maha. I tēnei āhuatanga, ka puta i te angitu ko ngā mātāpono me ngā paiherenga hira i te DEPA ki roto i ngā ture tauhokohoko anamata, ā, kei mua i ngā pakihi ko tētahi taiao whakature ōrite ake, ka mōhiotia.
Te tautoko i te auahatanga Māori
E arotahi ana te Rautaki ki te tautoko i te Māori ki te whakamahi me te waihanga hangarau matihiko hei whakapai ake i te oranga me te whanaketanga ōhanga. Kei te āta piki haere te nui o te Māori e mahi ana i roto i te rāngai hangarau, engari me nui ake ā tātau mahi kia taea ai e te Māori te whai ngā ara mahi whaihua i roto i te ōhanga matihiko. Me waihanga ngā kaimahi i tētahi taiao mahi manaaki me te tautoko i te kakenga ara mahi.
He maha ngā rakahinonga Māori kei te hanga i ngā hua hangarau auaha me ngā ratonga. He maha ngā pakihi matihiko Māori hou e arotahi ana ki ngā otinga taiao, pāpori me te ahurea hei kaupapa arumoni. Ka taea tonu e tātau te whakatipu tonu tēnei taiao mā te whakawhānui i ngā kaupapa kua tīmata kē, tae atu ki te Tahua Auahatanga Māori, te Kōkiri Start-up Accelerator me te Pakihi. Kei roto i te ahurea Māori ko te wairua auaha, auahatanga me te rakahinonga kei roto i tō rātau whakapapa. Na tēnei horopaki me te tirohanga ahurea he āhuatanga ahurei tō te Māori mō te auaha me te hanga rongoā e hāngai ana ki te ao.
Me pēhea tā tātau haumi ki ā tātau tāngata kia ārahi i ēnei otinga matihiko? Kei reira ētahi o mātau [Māori] kei tēnei rāngai, me haumi tātau ki a tātau, kia noho ko ā tātau tamariki ngā kaiārahi hei anga whakamua.
Nā tētahi whakaaetanga o nā tata nei i waenga i te Māori Spectrum Working Group kua riro i te Māori he wāhanga o te tūāwhiorangi ā-motu me tētahi tūranga i roto i te hanga kaupapahere tūāwhiorangi. Ka tautokona e tēnei whakaaetanga, e hangaia ai he Kōmihana Tūāwhiorangi Māori, te Māori ki te hanga i tētahi tūranga nui ake i roto i ngā whitimamao, me te rāngai hangarau whānui ake, te hanga i ngā painga ahurea, pāpori me te taiao.
Kei roto i ngā whai wāhitanga o ēnei tau e heke iho:
- ko te whakamahi i te rangahau Mahere Takahuritanga Ahumahi Hangarau Matihiko mō te pūnaha rauropi hangarau Māori
- ko te mahi me te Kōmihana Tūāwhiorangi Māori ki te whakapakari i ngā pūkenga me te whai wāhi o te Māori ki ngā ahumahi ā-tūāwhiorangi, ki tua atu hoki i roto i te rāngai hangarau whānui ake
- ko te haere tonu o ngā mahi kei te pūnaha auahatanga hei tautoko i ngā pakihi Māori hou
- ko te waihanga haere tonu i te pou tarāwaho whakaterenga Waka Hourua hei āwhina i te Māori ki te hāpai i ngā whai wāhitanga ka puta i ngā hangarau hou.
Kei roto i a Pakihi ko ngā akoranga poto tuihono koreutu i hangaia hei āwhina i ngā pakihi Māori kia anga whakamua, kia puāwai. Ka tuku a Pakihi i ngā pūkenga hou ki ngā kaiwhakauru, he mahere whakatipu, me te tuitui here ki ētahi atu pakihi Māori.
Ko te MBIE Māori Economic Development Unit kei te utu i te kaupapa, ā, ko Te Wānanga o Aotearoa kei te whakarato. Ko ngā kaiwhakauru ki a Pakihi ko ngā ranga Māori, ā rātau kaimahi, ngā Māori rānei e hiahia ana ki te whakauru ki te pakihi iti. Kei te whakaratoa anō ngā akoranga hei te tau 2022.
Te tautoko i te auahatanga ā-raraunga
Ka tautoko ngā raraunga i te auahatanga. Mā te whakamahi me te tātari i ngā raraunga ka tino pai ake pea te taurite a ngā ratonga i ngā hiahia kiritaki, te whakaiti para, me te hāpai ake i tō tātau mārama. He maha ngā kamupene o te motu kei te hanga kē i ngā hua ā-raraunga me ngā ratonga, engari ka taea e tātau te tautoko kia nui ake te whai mai.
Kua whakaurua e te Mahere Takahuritanga Ahumahi Hangarau Matihiko tētahi auahatanga ā-raraunga me te toro i ētahi o ngā take me ngā mahi ka whakarite kia kaunekehia te auahatanga e ngā raraunga mā tētahi āhuatanga e hāpai ana i te tūmataitinga, e tautoko ana i te mana whakahaere raraunga Māori me te whakatipu i te pono.
E arotahi ana i ngā hono ki te Mahi Tika, otirā te whāinga ka hoahoa ngā whakahaere me te whakamahi i ngā hangarau matihiko me ngā raraunga mā ngā tikanga whakawhirinaki, pūrangiaho.
Kei roto i ngā whai wāhitanga o ēnei tau e heke iho:
- ko te whakatipu i te mōhio mō te uara o ngā hangarau ā-raraunga, reanga hou hoki, tae atu ki te AI, 5G me Ngā Āhuatanga o te Ipurangi
- ko te whakawātea mai i ngā raraunga wātea mō te tangata kia auaha ai, hei tauira, ko ngā raraunga mokowā hei tautoko i ngā tāonenui atamai me te hangarau ahuwhenua, me te whakawhānui i tō tātau kaha ki te whakatōpū me te tuari raraunga
- ko te kauneke i tētahi rautaki AI mō Aotearoa
- ko te anga whakamua i Ngā Ara Anamata, ā, he hōpara me pēhea te hanga i tētahi pūnaha pūtaiao tūhono, urutau me te pakari, ā, kei roto ko ngā mātāpono hoahoa ka taea mō te tūāhanga rangahau
- ko te whakaputa i ētahi raraunga tuwhera a te kāwanatanga
- ko te waihanga i ngā utauta pai ake me ngā inenga mō te ine i te ōhanga matihiko.
Kei te arahina e Tatauranga Aotearoa ngā mahi kia māmā ai te whakataurite i ngā raraunga me te whakamahi puta noa i ngā pūnaha rerekē. Kia tino tōtika, kia whaitake ngā raraunga, me mātua whakaraupapa me te whakaōrite i ngā takotoranga arowhānui hei tautoko i te hototahitanga, whaiwhaitanga me te whakamahi tōtika anō.
I whakamanahia e Aotearoa te Tūtohinga Raraunga Tuwhera i te tau 2017, e whakaū anō i tana paiherenga ki ngā raraunga tuwhera. Nā te whakamana i te Tūtohinga i whai mātāpono, mahi hoki ngā tari kāwanatanga kia tere ake te tuku raraunga kāwanatanga tuwhera.
Te whakamātautau i ngā whāititanga mō ngā mea ka taea e ngā hōhipera te whakarato — Mātai kēhi: Te hōhipera hou o Ōtepoti
Kei te anga whakamua te hōhipera hou o Ōtepoti kia oti i mua o te tau 2028. Ina oti te hōhipera tino hou rawa $1.4 piriona te wāriu ko te tirohanga ka noho hei kaiārahi i roto i ngā otinga hauora matihiko.
E hangaia ana te hōhipera i ngā wāhanga e 2. Ko te tikanga ka huakina he whare tūroro noho kāinga hei te tīmatanga o te tau 2025 me tētahi whare tūroro noho hōhipera i mua o te tau 2028.
I kī a Tony Lloyd te Tumuaki o te hōhipera hou o Ōtepoti, ka ōrite te rahi o te hōhipera hou ki te hōhipera onāianei engari nā tōna hoahoa me tōna uaratanga hei whakamahi i ngā hangarau hou rawa kua noho koinei te hōhipera matihiko tuatahi o Aotearoa me te tino arotahi ki ngā rongoā matihiko hei whakapai i ngā tauwhitinga ā-pepa, ā-matihiko me ngā tūroro.
Kei roto i ngā painga tōtika ko te rerenga tūroro pai ake i te hōhipera me te urunga pai ake ki ngā wāhi tātaritanga me te maimoatanga, te whakaiti i ngā tōmuritanga. Engari, ko tō mātau hiahia he wāhi tēnei e whakamanuhiritia, e manaakitia ana te tangata.
Kei roto anō i te hoahoa ko te hangarau me ngā tukanga hei whakapai ake i te tōtikatanga, te whakarei ake i te wheako tūroro me ngā kaimahi me te whakapiki ake i te takatū mō te mate urutā, ā, ka whai painga mō ngā tāngata puta noa i te Tai Tonga. Te whakarite ka noho tonu te haumarutanga o ngā pūnaha whakahaerenga matihiko me te raraunga hei kaupapa matua.
Mā te tīmata i te hōhipera hou mai i te papa ka taea te whakawhānui atu anō i ngā whakataenga nui rawa o te manaaki hōhipera e whakahaerehia ana i te ao, otirā i ngā wāhi pērā i te Amerika me Kōria. Kei te hiahia tātau ki te whakamahi i ngā tāngata o konei tonu, pērā i te pokapū CODE i konei i Ōtepoti, kia mahi tahi me mātau me te tino whakamātautau i ngā whāititanga o ngā mea ka taea e ngā hōhipera matihiko te whakarato.
Te whakamahi i te hangarau māhanga matihiko
Ko tētahi o ngā kōwhiringa e whakaaroarohia ana mō te hōhipera hou ko te whakaurunga mai o te hangarau māhanga matihiko. Ka whakaatu tēnei i te pūtake, te hanga me te rā whakakapi pea o ia mea ka whakamahia i roto i te hangatanga me te whakahaere i te hōhipera, te whakamahere ā-matihiko i ngā āhuatanga mano tini.
I roto i te hangatanga tino hou rawa e mōhiotia ana ngā taipitopito mō ia āhuatanga o te tūāhanga waihanga, ia pae, kakau kūaha, matapihi, aha atu, aha atu, hei whakakapi i ngā rauemi i mua i te matangarongarotanga (hei tauira, te whakakapi i ngā papa matapihi i mua i te pirau me te tuturu).
I kī a Lloyd ko te hiahia o ngā rōpū o te hōhipera hou o Ōtepoti kia whānui ake te whakamahi i te hangarau māhanga matihiko hei whakauru i ngā āhuatanga hei whakahaere i te hōhipera. Kei roto i tēnei ko te mōhio ki ngā taipitopito o te wāhi, te tautiaki me te whakakapinga o ngā kaupane manawa, ngā oka a te rata kokoti, ngā mīhini whakahā me te maha atu. Me te whakakapi hoki i ngā pūrama o ngā rama taiwhanga i mua o te pahūtanga, arā, kia kaua e ngaro ngā haora taiwhanga. Ko te nuinga o ngā utu o tētahi hōhipera ko te tautiaki, e kī ana ia, ko tikanga pea mō ia $1 miriona ka whakapaua ki te hoahoa, $10 miriona ka whakapaua ki te waihanga, ā, tata ki te $100 miriona atu anō mō te whakahaere me te tautiaki i te hōhipera i te 40 ki te 50 tau.
Mā te whakamahi i te hangarau māhanga matihiko ka whakapiki ake i te tōtikatanga, ā, ka taea ngā penapena nui rawa i roto i te wā, tae noa ki te whiriwhiri i ngā utu tuatahi o te hoko me te whakauru mai.
He whakaaroarohanga hira tēnei inā 421 ngā moenga o te hōhipera hou, 16 ngā taiwhanga poka tinana (ka taea te whakawhānui ki te 21 ngā taiwhanga poka tinana) me ngā wāhanga whāomoomo 30 (ICU), ngā moenga whakamauru nui (ka taea te whakawhānui ki te 40) me te tautoko anō a te whare tūroro noho kāinga i ngā whakaratonga manaaki waka tūroro nui ake.
Ngā kēmu mō te hauora
E tino mahi ngātahi ana te kaupapa me te New Zealand Centre of Digital Excellence (CODE), he pokapū nō Ōtepoti i hangaia hei kauneke i te whakawhānuitanga o te ahumahi kēmu ataata o Aotearoa e tipu haere ana.
Kei ngā kēmu mō te hauora te kaha ki te whakapai ake i ngā putanga hauora mā te whakatairanga i te oranga noho hauora, te ārai me te whakatau mate, te maimoatanga me te whakarauoranga, ā, mā ngā kaiwhakarato ratonga whakangungu me te whanaketanga ngaio.
Ngā Putanga Whakarerekē Kēmu — CODE
Ko tētahi kaupapa i whiwhi pūtea mā ngā kēmu mō te hauora (i hangaia tahitia e CODE me Enterprise Dunedin) i nā tata nei ko tētahi kēmu ataata e kīia ana ko Nutri-Islands, ā, he mea hanga hei whakawhānui ake i ngā mōhio o ngā tamariki mō te kai.
E kī ana te kaihoahoa kēmu me te tohunga kai a Claudia Leong, PhD, kua kitea e ngā rangahau e whakapono ana tamariki me ngā mātua ka taea e ngā kēmu ataata te tuku tētahi ara hei whakanui ake i te mōhio mō te kai. Engari, me whakatika ngā tirohanga kino pērā i te whakamahinga wā mata i mua i te whakamanatanga whānui. Ko te rangahau tuatahi i tuku mōhiohio mō ngā pūhanga o te kēmu ka whakahihiri i te hoahoa kēmu me te whakarei ake i te purei kēmu ataata mō te mātauranga kai.
Ka whakaurua mai ngā utauta kēmu matihiko pērā i tēnei ki te āhua o te hoahoa i ngā hōhipera manaaki me te matihiko ā tōna wā.
He aha te tikanga o tēnei mō ngā tūroro me ngā kaimahi
Kei te hiahia tātau kia taea e te hangarau paihere i te hōhipera hou i ngā manaaki tūroro kounga me te wā tika. Ka nui ake te āhei atu o ngā tūroro ki ngā mōhiohio me te whiwhi i ētahi ratonga anō i te kāinga me te hapori.
Me te aha, me te uru ā-tūnga a ngā kaimahi ki ngā mōhiohio hauora, ka nui ake te anga whakamua o te wheako tūroro, ā, kia whaiaro ake.
Ko te hiahia kia māmā ake i te hōhipera hou kia nui ake te aro a ngā kaimahi hōhipera ki ngā tūroro tēnā ināianei. Kei roto i tēnei ko ngā pūnaha whakahaerenga tāpuitanga, whakahaerenga pūkete (tae atu ki te whai wāhi a ngā tūroro i ā rātau anō pūkete hauora), kia pai ake te mōhio ki ngā wāhi katoa o te hōhipera, ngā pūrere whakamau ka pai ake te whaiwhai i te hauora tūroro me ngā wehenga tōmua ake (i te mea ka tirotiro haere tonu te hōhipera i ngā tūroro i te kāinga).
Ka whānui atu ngā rongoā hou ki tua atu o ngā pātū o te hōhipera, e tūhono ana i hōhipera tuawhenua o te Poari Hauora ā-Rohe (ngā DHB) me ngā ratonga i waho hōhipera.
Kei te whakatikatika a Southern DHB i ana mahere kaupapa mahi i roto o WellSouth me ētahi atu DHB i roto i tētahi tukanga mahi tahi e whiwhi painga ai a Te Waipounamu.
Kei te tuari anō tātau i ā tātau akoranga ā-motu, kia whai hua ai te pūnaha hauora whānui mai i ngā mahi e mahia ana tātau.
Ko te uaratanga mō te hōhipera hou o Ōtepoti kia noho hei mahere mō te hanga i ngā hōhipera o Aotearoa e 5 atu anō kei whakaritea ināianei. Ko ētahi o ngā hangarau e whakaarohia ana ka hiahiatia pea e ētahi atu ahumahi pērā i a ngā taunga rererangi o Aotearoa.
Ngā raraunga pai ake, ngā whakaaro nui, ngā rongoā atamai, ngā anamata tiaho ake — Mātai take: Hira
Kei te whakareri a Aotearoa mō tētahi pūnaha hauora e āhukahuka ana i te uara o ngā raraunga tino kounga mō te whakamana i te manaaki tino kounga — ka mutu, ko Hira te mea whakarerekē e tinana ai tēnei.
Puta noa i Aotearoa, kei te mahi tahi ngā whānau me ngā hapori, te rāngai hauora me te hauātanga me te ahumahi hauora matihiko kia tinana ai a Hira.
Mā te katoa, mō te katoa
He āheinga matihiko a Hira e whakamana ana i ngā mōhiohio hauora tōpū kia whakaratoa ki te iwi katoa o Aotearoa ahakoa kei hea rātau, ā, ina hiahia rātau. He āhukahuka tēnei he ahurei ia tangata — he rerekē ōna manakohanga, ōna āheinga me tōna kaha ki te toro me te whakapeto mōhiohio. E āhukahuka anō ka puritia ngā mōhiohio hauora puta noa i ngā pūnaha maha, e whakatakotoria ana i ngā āhua me ngā takotoranga rerekē, e whakamahia ana hoki mō ngā kaupapa rerekē.
I Aotearoa, he rerekē ngā putanga hauora mō ētahi tāngata, he tōkeke kore, ā, ka taea ērā te karo. Te whakapai ake i ngā putanga mō te tangata whenua ka whakarangatira ake i tō tātau tuakiri, ā, he mea taketake mō te waihanga i ngā hapori momoho. I te taha o ngā iwi, te rangatahi, ngā whānau me ngā rōpū hapori kei te tuitui taura here te rōpū Whatu Ora, te whakatau kaupapa matua me te hōpara i ngā tikanga hou mō Hira ki te tautoko i te hauora me te mana motuhake me te tino rangatiratanga.
He taonga te mōhiohio
Ka whakarite a Hira ka wātea mai ēnei mōhiohio mā ngā āhuatanga ka whai take mō te katoa — me te whakarite ka pai ake te toro a te tangata ki ā rātau raraunga hauora e puta ai ētahi atu putanga pai. Ko te tikanga o tēnei ko ngā tikanga hōu me te atamai ake mō te mahi me ngā mōhiohio hauora me te tauwhitiwhiti me ngā ratonga hauora me te oranga. Ko te tikanga o tēnei ka nui ake te kōwhiringa i te manaaki hauora, me ngā putanga pai ake i hapori. Ka kakama ake te tangata ki te whakahaere ake i ā rātau ake manaaki hauora me te manaaki i tō rātau whānau. Ka pai ake te whakarato i ngā ratonga hauora i roto i te hapori e ngā kaiwhakarato o te rohe.
Hei whakatutuki i ēnei katoa, te whakarite kei te iho o Hira te tangata me ngā hapori, he mea nui te waihanga i ngā āhuatanga me te taumahinga o Hira. He mahi nui mā te hapori te hanga me te whakarato i a Hira e taea ana mā ngā hononga i waenga i te tangata me ngā whānau puta noa i ngā rohe, ngā rāngai ratonga hauora, hauātanga me te pāpori, te ahumahi hauora matihiko, me Te Whatu Ora.
Te whakarite kei te mahi
E ōrite ana ki te pēke tuihono, ka whakahiatohia e Hira ngā raraunga mai i ngā pūnaha rerekē ki te wāhi kotahi hei hanga i tētahi tirohanga kotahi. Ka tutuki tēnei mā te whakamahi i ngā tāhono papatono taupānga (ngā API). Mā ngā API ka rite ngā mōhiohio ki te pūkete 1 engari ka ahu mai ngā raraunga mai i ngā pūtake maha. Ka tukua anō e ēnei ngā pūnaha onāianei pērā i ngā tomokanga tūroro me te kaiwhakarato me ngā pūkete hauora tāhiko te whakakī ki ngā mōhiohio mai i ētahi atu pūkete maha.
Ā tōna wā, ka taea e ngā tāngata o Aotearoa te uru atu me te whakahaere i ā rātau mōhiohio mā tā rātau waea atamai, paparorohiko, rorohiko rānei. Kei reira anō ētahi atu kōwhiringa ka taea e te katoa mā te hunga kāore i te āhei atu ki te hangarau, e hiahia i te whakamahi rānei.
Te whakarite he whaitake
He mahi nui, uaua hoki te whakarato i ngā kaha ka takahuri i te rāngai hauora me te hauātanga o Aotearoa, ā, e mārama ana ki ngā whakapātaritari me ngā hiahia e taea ai e tētahi rongoā pērā i a Hira te āwhina ki te whakarite te mahi tuatahi. Hei whakatakoto i tēnei tūāpapa, kei te kōrerorero te rōpū ki ngā tāngata, tō rātau whānau me ō rātau hapori, me ngā kaiwhakarato ratonga hauora, hei kimi i ngā raruraru ki ō rātau whakaaro me rongoā.
Engari ko ngā wāhi e taea ai te whakamahi te hangarau hei rongoā i ngā raruraru tino uaua, ka whānui atu te mahi a te rōpū. E noho pono ki te oati a Hira — ko te tangata tōna iho — ko ngā kōrerorero he whakahihiri hei whakaaroaro he aha ngā mea ka taea e te hangarau mō te manaaki hauora, ā, kaua ngā mea me mahi, e mahia rānei. Kei te whakaaroarohia e te rōpū ngā mea e kore e taea me te hoki whakamuri mai i reira, me te whakarite kei te whaitake a Hira mō te hunga e whakamahi ana i te hangarau me rātau kāore i te whakamahi.
Te tūtakitanga o te hao nui i te auahatanga
Ko ngā kitenga i puta i ngā kōrerorero a Hira ka whakarato anō i tētahi puna ohooho ki te ahumahi hauora matihiko. E kī ana i ngā whakaaro, ā, pūmau ana ki te hanga i ngā hangarau whai take me ngā rongoā kōmitimiti e whakakotahi ana i ngā hiahia ake ki ngā raraunga wā tika, ngā horopaki me ngā tautuhinga, kei te āwhina ngā kaihoko ki te whakapoto i te wehenga i waenga i te whakamahinga pai ake o ngā raraunga me te hanga i tētahi pūnaha manaaki hauora atamai ake.
Ko te whakaoho i tētahi ao matihiko hou māia ake mō te manaaki hauora i Aotearoa he mahi wā roa, ā, ahakoa e hōparahia ana ngā mea katoa ka taea, ka tuku a Hira i te kaha i te tuatahi hei uru atu me te pāhekoheko ki ngā mōhiohio taketake pērā i ngā:
- ngā taipitopito whaiaro
- werohanga KOWHEORI-19 me ngā otinga whakamātautau
- rongoā ka tūtohua me te whakarato
- āheitanga hauora me te oranga.
Ngā painga mō ia tangata o Aotearoa
- Mā te kite i ō raraunga hauora hou rawa i tētahi wāhi 1 me te whakarite ka taea ngā mōhiohio hauora e te katoa, ka taea te tuari, ka tōtika ake te uru ki ngā ratonga hauora me ngā putanga hauora pai ake mō ngā tāngata katoa o Aotearoa.
- Ka pai ake te tautoko i ngā ngaio hauora ki te whakatau tikanga manaaki mō ā rātau tūroro, kiritaki hoki me te uru ki tētahi pūkete mariko kotahi, ki te wāhi me te wā e hiahia ana rātau.
- Ko te hunga e mahi ana i te hauora matihiko ka whiwhi i ngā whai wāhitanga nui ake hei huri i ā rātau whakaaro auaha kia tinana ai, ā, kia whaitake ai.
Atu ki te $170 miriona i whakaaetia mō Hira ki te tau 2025 mai i te tahua $400 miriona o te Tahua 2021 mō te tūāhanga me te kaha matihiko rāngai hauātanga. He mea whakarato i ngā wāhanga e 3, ka whakarato tēnā me tēnā i ngā ratonga hou me te taumahinga hou.
Ko te rangi te tiketiketanga.
E aro ana ki ngā pūkenga me te mātauranga
Kia puāwai a Aotearoa matihiko ināianei, ā, ki āpōpō, me whai pūkenga te tangata me ngā mōhiotanga me ngā āheinga. Ka rerekē ngā mea e hiahiatia ana e tēnā, e tēnā, e ai ki ā rātau whāinga me te wāhanga o tō rātau ao. Hei whakarato i te whakangungu pūkenga, whakangungu me te mātauranga, me whai tātau i ngā tūmomo kaupapa tōtika, ā-tangata hoki me ngā whai wāhitanga ā-mahi. He mea waiwai te whanaketanga pūkenga, whakangungu me te mātauranga ki ngā kaupapa Rautaki e 3 katoa.
He whanaketanga hira Ngā Pūkenga Matihiko me te Mahere Pūmanawa e whakatakoto ana i te ara mō te whakarahi ake me te takahuri i ngā pūkenga, whakangungu me ngā ara mātauranga e hiahiatia ana e tātau mō tētahi ahumahi hangarau matihiko momoho. He mea hanga te Mahere e te ahumahi me ngā kōrerorero tahi whānui me te rangahau. I whakahaerehia e te Rōpū Ārahi te whanaketanga o te Mahere, me ngā mema mai i te ahumahi, kāwanatanga, ngā whare wānanga me te pāpori whānui.
Kei roto i te Mahere ko ngā mātāpono me ngā mahi tauwhāiti, tae atu ki tētahi arotahi kaha mō te whakapakari pūkenga me te whai i tētahi aronga kāwanatanga whānui ki ngā pūkenga. Ka kauneketia ngā kaupapa o te Mahere i roto i te ara mahi pūkenga o te Mahere Takahuritanga Ahumahi Hangarau Matihiko.
Kei te mahi tahi a MBIE me ngā tari kāwanatanga i te taha o te ahumahi ki te waihanga i tētahi aronga hāngai hei whakatinana i te Mahere i roto i te wā poto, paetata hoki. Me nui te neke o te aronga mō te whakatinanatanga, ā, me tētahi paiherenga ki te mahi, ā, ka takea mai hoki i ngā huringa pūnaha takahuritanga onāianei, hei tauira, te whakahou i te mātauranga ahumahinga.
Mō te whānuitanga, me arotahi tātau me te haumi ki te whanaketanga pūkenga, whakangungu me te mātauranga i a tātau e whai ana i ā tātau whāinga. Kei roto i tētahi aronga pakari, tōtika ki te akoranga pūmau:
- ko ngā akoranga matihiko i roto i te marautanga ā-motu mō ngā taiohi e āwhina ana i a rātau kia puta ō rātau ihu i ngā kaupapa pūtaiao, hangarau, pūkaha, pāngarau, auaha hoki me tua atu. Me kōmitimiti te hangarau matihiko ki te akoranga puta noa i te marautanga me te tautoko i te taiohi kia puta hei kaiārahi matihiko
- te whakangungu, kaiako pono me te whanaketanga mō ngā kaimahi ahakoa te wā o tā rātau ara mahi. Otirā, me ako ngā kaimahi me te waihanga i ngā ‘pūkenga ngāwari’ hei hanga me te whakahaere i ngā pūnaha matatini, ā-tangata hoki, ngā pakihi me te tūāhanga. Kei roto i ēnei pūkenga ngāwari ko te tuitui taura here, te whakaaro auaha, ngā whakawhitiwhiti kōrero mārama me te whakatau wenewene
- te whakawhanake i te whakaaro kaikini me te mōhio ā-matihiko o ngā tamariki me ngā taiohi mā te kura kōhungahunga me te kura, i te taha o ngā kaupapa mātauranga tūmatanui hei whakatipu i te mōhio pāpāho matihiko i roto i te hapori. Ka whakarite tēnei ka kitea e te tangata ngā ihirangi teka, me te mōhio ki ngā pūtake pūnahanaha e hiahia ana i ngā rongoā whānui ake
- ngā whakangungu ahumahinga me te whakanoho wāhi mahi me ngā ahumahi hei whakawhanake i ngā kaimahi hangarau pūhou. Ka āwhina tēnei ki te whakatipu i te puna o ngā kaimahi hangarau whai pūkenga i Aotearoa. Ka whakarite anō ko ngā rōpū kāore e tino kitea pērā i te Māori, ngā wāhine me te hunga hauā kia whiwhi tautoko me te kaiako pono i ngā ara mahi hangarau
- ara mahi me te whanaketanga umanga mō te ohu mahi rāngai hangarau onāianei, kia mau ai me te whakatipu i ō rātau pūkenga me te whakawhānui ake i tō rātau kaha ki te tohutohu me te ako i ngā kaimahi hangarau pūhou me te ārahi i a rātau ki te ara pūkenga
- te uru ki ngā akoranga pūmau hei āwhina i te tangata i ngā wāhanga katoa o te ora kia urutau ki ngā hangarau hurihuri. Arā, mai i te āwhina i te tangata ki te whakamahi i ngā taputapu kāinga e tūhono ana ki te ipurangi, ki te whakapakari ake i ngā kaimahi kia momoho ai rātau i te whakaurunga o te hangarau hou ki ngā mahi.
He aha ngā ara ki ā tātau rangatahi mō te ako hangarau matihiko? He aha ngā tauārai mō rātau e whakauru nei ki te ako? Me whakarato e tātau tētahi āhuatanga ako hou mō te Māori i roto i te wāhi hangarau. Ko taku wawata kia whakauru mai ngā rangatahi ki te wāhi [hangarau] mā tētahi ara Māori.
Te whakatinana i te Rautaki
E tautokona ana te Rautaki Matihiko mō Aotearoa e te Mahere Mahi e whakatakoto i ngā kaupapa hei tautoko i te uaratanga me ngā whāinga. He mea whakahou te Mahere Mahi tuatahi i ia 12 me te 18 marama hei whakarite kei te hāngai pū i runga i ngā ia e ara ake ana me ngā kaupapa matua. E tūmanako ana mātau me whai pūtea me te kaha i roto i ngā tau hei tautoko i ngā wawata me ngā whāinga o tēnei Rautaki.
Tā mātau aronga mō te whakatinanatanga: wheako, ako, urutau
Ka auau te whakatinana i te aronga ki te whakatinana i te Rautaki Matihiko mō Aotearoa mā tētahi tauira o te ‘wheako, ako, urutau’. He tukanga akiaki tēnei e whakatenatena ana i te hōpara me te auahatanga, ā, ka whakarite kia mau tonu ki te uaratanga me ngā whāinga o te Rautaki i roto i te horopaki o te hangarau tere me te huringa pāpori.
Ehara i te mea ka whakaūngia tonutia ngā kaupapa katoa, ngā whakaritenga, ngā tikanga rānei hei whakatinana i te uaratanga me ngā whāinga o tēnei Rautaki e hiahiatia ana, ā, ka whai wāhitanga tātau i tēnei tauira ki te tirotiro anō me te whakatika i tā tātau aronga ki te anamata. E tūmanako ana mātau i ia 12 ki te 18 marama, ka whai tātau i te hurihanga e whakaaturia ana i te Hoahoa 2.
Whakaahuatanga āmiki o te hoahoa
E whakaatu ana te Hoahoa 2 i te aronga auau ka whāia hei whakatinana i te Rautaki Matihiko mō Aotearoa mā te whakamahi i te tauira o te ‘wheako, ako, urutau’ mā tētahi pere e tīmata ana i te ‘wheako’, ka neke atu ki te ‘ako’, kātahi ko te ‘urutau’, ā, ka tāruarua. E whakaatu ana ia wāhanga i te:
- Wheako: ā-mahi, ārahi ngātahi, ka whakahautia rānei e te kāwanatanga e tautoko ana i te uaratanga, ngā kaupapa me ngā whāinga i te taha o ētahi atu.
- Ako: ka pūrongohia ngā kaupapa, ā, kei te ū tētahi pou tarāwaho inenga, hei whai haere i te anga whakamua e ai ki te matakitenga me ngā whāinga. Ka tuku whakaaro te hapori whānui mō te anga whakamua, ā, mēnā kei te ara tika tātau.
- Urutau: ka tukuna ngā whakatau mēnā me tāpiri, me huri, me wetewete rānei ngā kaupapa kia taea ai te whāinga, ngā whāinga rānei.
Te ine angitu
Kia mārama ai kei te pēhea te anga whakamua o Aotearoa ki te uaratanga me ngā whāinga o tēnei Rautaki, me mārama tātau ki te āhua o te angitu me ngā upane e taea ai ki reira. E whakaatu ana te Hoahoa 3 i ngā taumata e 3 o ngā tūtohu me ngā pou tarāwaho ka āwhina i a tātau kia mārama ai ki te anga whakamua me te whakahāngai i ngā mahi anamata e ahu ana ki ngā whāinga me te uaratanga o te Rautaki. Ka āwhina tēnei pou tarāwaho kia mārama ki te anga whakamua me te whakamōhio i ngā whakatau tikanga a ngā minita me ngā tari mō te whakarite mahere, ngā kaupapa matua me ngā tono Tahua.
Whakaahuatanga āmiki o te hoahoa
E whakaatu ana te Hoahoa 3 i ngā taumata e 3 o ngā tūtohu me ngā pou tarāwaho ka āwhina i a tātau kia mārama ai ki te anga whakamua me te whakahāngai i ngā mahi anamata e ahu ana ki ngā whāinga me te uaratanga o te Rautaki. Ko ngā taumata e 3:
- Te Pou Tarāwaho Paerewa Noho me He Ara Waiora — Te Tātari i te oranga whānui
- Ngā whakaritenga Rautaki Matihiko — Te whai haere i te anga whakamua ki ngā whāinga
- Ngā whakaritenga kaupapa — Te mārama ki te whaitake o ngā mahi tauwhāiti.
Te mahi ngātahi
Ahakoa e arotahi ana te Rautaki ki te ārahi mahi, ārahi ngātahi, ka whakahautia rānei e te kāwanatanga, kāore tātau e tae atu ki te uaratanga anamata mō tētahi Aotearoa matihiko ki te kore he mahi a ngā tāngata maha, ngā hapori, ngā iwi, ngā hapū, ngā pakihi, ngā whakahaere kāwanatanga-kore me ngā tari kāwanatanga.
Ko te nuinga o ēnei mahi me mahi tahi. Ka kite koe i tēnei e whakaatahia ana puta noa i te Rautaki, hei tauira, i te:
- te hoahoa ngātahi o tētahi tauira mana whakahaere raraunga Māori ko te Rōpū Raraunga o Ngā Rangatira ā-Iwi
- te pātui a te MBIE me NZ Tech me ētahi atu māngai rāngai hangarau mō te Mahere Takahuritanga Ahumahi Hangarau Matihiko
- Karanga a Ōtautahi ki te ao hei whakarite i te whakarekereke kino tuihono
- whakangungu pūkenga matihiko e arahina ana e ngā kaiwhakarato hapori.
Me tono tonu te kāwanatanga i ngā tohutohu motuhake pakari, ā, ka ako tonu haere tonu mai i te Kaunihera Matihiko o Aotearoa, te Digital Boost Alliance me ētahi atu tāngata whai pūkenga me ngā whai mōhio puta noa i tēnei hīkoi.
Te whakahaere me te whakatau ahunga
Ko ngā kaupapa e tautoko ana i te Rautaki Matihiko mō Aotearoa ka arahina, ka arahina ngātahi, ka utua rānei e ngā tari kāwanatanga rerekē puta noa i ngā tūmomo kōpaki, me ngā ara kawenga ki ngā Tumuaki me ngā Minita. He mea nui kia honoa ēnei mahi hei whakarite i te anga whakamua ki te uaratanga me ngā whāinga o tēnei Rautaki. Kei reira anō te hiahia mō te whakariterite puta noa i ngā kaupapa rerekē me ngā tari e tautoko ana i te Rautaki.
E 3 ngā taumata o te kōrerorero tahi me te whakahaere hei tautoko i te Rautaki Matihiko:
- minita: e whakaratoa ana e te Rōpū Minita Matihiko
- tari: e whakaratoa ana e tētahi rōpū kaiārahi i waenga tari
- rūnanga hunga whai pānga maha: ko te hapori, ngā pakihi, iwi whānui me te Māori hei pātui Tiriti.
He mahi atu anō kei te haere hei whakawhanake ka pēhea nei e mahi ai ēnei āhuatanga e 3.
Āpitihanga 1 — Te whānui o tēnei Rautaki
He Rautaki ā-motu tēnei e kapi ai ngā mahi e arahina ana, kua whakahautia rānei e te kāwanatanga, me ngā mahi ka oti i te taha o ētahi atu. E arotahi ana kia tika te ū o ngā wāhanga, kia taea ai ngā whakahaere, ngā pakihi me ngā hapori te puāwai, ā, ka pai ake te tautoko i te tangata ki te tautoko, me te momoho hoki i te ao matihiko. Kei roto i tēnei ko te whakamahi i ngā tūmomo kaha me ngā utauta e wātea ana ki te kāwanatanga me te rāngai tūmatanui pērā i te whakaratonga tūāhanga, whai ratonga, hanga kaupapahere, whakature, ine me te tuku ratonga.
E kapi ana anō i te Rautaki me pēhea e tautoko ai ngā hangarau me ngā raraunga matihiko i te anamata matihiko o Aotearoa engari kāore i te arotahi ki te whanaketanga, te whakatinanatanga rānei o ngā hangarau tauwhāiti, hei tauira, te Ipurangi o ngā Mea, te pātengi porohono. Ko ngā kino ka taea e te whakatinanatanga matihiko whānui, pērā i te tukutukutanga o ngā kōrero horihori me te parau, kei roto i te whānuitanga.
Kāore e tino kapi i tēnei Rautaki te āhua o te whakamahi a ngā tari kāwanatanga takitahi i ngā hangarau me ngā raraunga matihiko hei āwhina ki te whakarato i ā rātau whāinga whakahaere, hei tauira, i roto i te hauora, te ikiiki rānei, te tukanga whānui rānei o te takahuritanga matihiko i roto i ngā tari rāngai tūmatanui. Kei reira ētahi atu tūmomo rautaki kāwanatanga e tautoko ana, e whai whirinakitanga hoki me te Rautaki Matihiko mō Aotearoa. E rārangi ana ēnei i roto i te Āpitihanga 4 — Te tautoko a ētahi atu rautaki.
He aha te tikanga o te matihiko ki a tātau?
Ina kōrero tātau mō te ‘matihiko’ i roto i tēnei Rautaki, kei te kōrero tātau mō te pūmanawa mārō me te pūmanawa rorohiko, te tūāhanga e tautoko ana i tērā, me ngā raraunga e tino hira ana ki ēnei pūnaha.
E kōrero anō te Rautaki mō ngā ture me ngā kaupapahere e whakahaere ana i ngā hangarau matihiko me ngā taupānga, me ngā pūnaha hangarau-pāpori e noho ana te matihiko i roto. Ko te tikanga o tēnei kāore tātau i te arotahi anake ki ngā hangarau matihiko anake engari ki te āhua o te hoahoa me te whakatinana, ā, ko wai ka whiwhi kōrero, ngā raraunga e whāngai ana ki roto, ka hangaia hoki, te maha o ngā tikanga e whakamahia ana, ā, me ngā pānga pāpori, pūtea, taiao me te ahurea ka puta ake.
Āpitihanga 2 — Ngā Mema o te Rōpū Minita Matihiko
Ko te kaupapa o te Rōpū Minita Matihiko he tautoko i te whanaketanga o tētahi Rautaki Matihiko mō Aotearoa me te whakatinanatanga. Ko ngā mema me ā rātau kōpaki i roto i tēnei rōpū ko:
- Hōnore Tākuta David Clark, Minita mō te Ōhanga Matihiko me Ngā Whakawhitiwhitinga me te Minita Tatauranga (Heamana)
- Honore Stuart Nash, Minita mō te Ōhanga me te Whanaketanga ā-Rohe me te Minita mō Ngā Pakihi Iti
- Hōnore Grant Robertson, Minita Take Pūtea me te Minita Tūāhanga
- Hōnore Meka Whaitiri, Minita Tatauranga Tuarua.
Kua whakaurua mai anō ētahi atu Minita kia whai wāhi mai ki tēnei rōpū, tae atu ēnei:
- Te Manatū Aorere
- Hīkina Whakatutuki
- Mātauranga
- Te Kawa Mataaho
- Te Tāhu o te Ture
- Te Arawhiti
- Mātauranga Tuarua
- Te Whakatipu Tauhokohoko me te Hoko Whakawaho
- te Minita mō te Tira Tiaki (GCSB), Te Pā Whakamarumaru (NZSIS)
- te Minita mō Ngā Kaumātua
- te Minita mō Te Tari Taiwhenua.
E whakaata ana tēnei Rōpū ko ngā mahi e pā ana ki te Rautaki ka noho ki roto i ngā kōpaki rerekē maha e whakaaturia ana i te tūtohi 1:
| Ngā Minita Kōpaki | Ngā tari tautoko |
|---|---|
| Minita mō te Ōhanga Matihiko me Ngā Whakawhitiwhitinga |
|
| Minita mō Ngā Pakihi Iti | MBIE |
| Minita mō Te Ōhanga me te Whanaketanga ā-Rohe | MBIE |
| Minita o Te Tari Taiwhenua | DIA |
| Minita Tatauranga | Tatauranga Aotearoa |
| Minita mō te Rangahau, Pūtaiao me te Auahatanga |
|
| Minita mō te GCSB me te NZSIS |
|
| Ngā Minita whai mana mō ngā tari kāwanatanga tae atu ki te Pirimia, te Minita o Te Kawa Mataaho me te Minita Take Pūtea |
|
|
Ētahi atu kōpaki minita whakarato me te whakaūnga tae atu ki ēnei:
|
|
Āpitihanga 3 — E whakaata ana i ngā whakaaro o te iwi o Aotearoa i roto i te Rautaki Matihiko
He mea nui kia whai whakaaro te Rautaki ki ngā wawata o ngā tāngata, ngā pakihi, ngā whakahaere me ngā hapori puta noa i Aotearoa. I te Oketopa 2021, i whakaputaina e mātau te tuhinga matapakinga “Te koke ki tētahi Rautaki Matihiko mō Aotearoa” hei kōrerorero tahi mā te iwi whānui.
I roto i te tukanga kōrerorero tahi:
- e 4 ngā hui mariko
- e 2 ngā hui mariko me ngā kaiārahi iwi me ngā kaihanga auaha Māori tata ki te 100 kei roto i ngā kaupapa Māori me te hangarau matihiko
- e 2 ngā hui mariko me ngā tāngata o te hapori hauā, e arotahi ana ki te whakatapoko matihiko
- 1 te hui e arotahi ana ki te taiohi, ā,
- 1 te hui mariko me ngā tāngata o ngā hapori o Te Moananui-a-Kiwa.
Neke atu i te 320 ngā tāngata o te iwi whānui i tae ake ki ngā huihuinga mariko 10. I whiwhi anō mātau i ngā tāpaetanga tuhinga mai i ngā tāngata me ngā whakahaere, me ngā whakaaro i tukuna mā tā mātau utauta mahi tahi tuihono.
Ko ngā whakaaro me ngā tūtohutanga i tuarihia i roto i ēnei tāpaetanga tuhinga me ngā hui i ārahi i te waihanga i te Rautaki. Kua whakaputaina he whakarāpopototanga whānui kei te paetukutuku Digital.govt.nz.
Ngā mea i rongo mātau — Whakarāpopototanga o Ngā Whakawhitiwhiti Kōrero ki te Iwi Whānui
Kua puta ngā huatau tauwhāiti, āmiki hoki te hunga tokomaha mō ngā kaupapa ka taea e taea ana te tautoko te uaratanga me ngā whāinga o tēnei Rautaki. Ka āwhina ēnei huatau ki te whakamōhio i ngā mahi haere ake nei.
He mea whakarite te Rautaki Matihiko i te wā e āta whakaaroarohia ana ngā take uaua i whakaarahia ana e ngā whai wāhitanga matihiko me ngā whakapātaritari mā ngā rūnanga me ngā kaupapa maha a te kāwanatanga, kāwanatanga-kore hoki. Hei tauira, i puta i Te Rōpū Whakamana i Te Tiriti o Waitangi tētahi pūrongo 2522 i te pito o te tau 2021 mō te pūtahitanga i waenga mātauranga Māori, te ao matihiko, me ngā ture tauhokohoko ā-ao e pā ana ki te ī-tauhoko.
Kua hangaia te nuinga o te Rautaki Matihiko i taua wā, engari he maha ngā āhuatanga i tātarihia i roto i taua pūrongo kua whakaaroarohia i te taha o te tukanga waihanga me te kōrerorero tahi mō te Rautaki. Ko ngā tohutohu i tukuna e te Rōpū Whakamana ka whāngai i te Rautaki me ngā whakaritenga whakatinanatanga ā muri ake.
Tēnā rawa atu koutou katoa i tuku whakaaro mai i roto i te tukanga kōrerorero tahi.
Āpitihanga 4 — Te tautoko a ētahi atu Rautaki
He rautaki taumaru te Rautaki Matihiko mō Aotearoa, e tautokona ana e ngā rautaki tauwhāiti me ngā kaupapa mahi mō ngā āhuatanga ake o ngā mahi. Kei roto ko ēnei:
- Te Rautaki Raraunga a te Kāwanatanga me te Mahere Ara 2021 — Data.govt.nz
- Te Mahere Takahuritanga Ahumahi Hangarau Matihiko — MBIE me NZ Tech, kei te hangaia
- Te Rautaki Whakamaru Ipurangi o Aotearoa 2019 — DPMC
- Rautaki mō tētahi Rāngai Kāwanatanga Matihiko — DIA, 2020
- Rautaki Matihiko me Ngā Raraunga Mātauranga, e whakahaerehia ana e te Education Sector Stewardship Forum, kei te hangaia
- Te Mahere mō te Whakaurunga Matihiko — DIA, 2019
- Rautaki He Oranga Kaumātua: He Mahere Mahi 2021—2024 — Te Tari Kaumātua
Te whakariterite i ngā tikanga puta noa i te kāwanatanga ki te whakarite ka tino mau tonu i ēnei kaupapa matihiko me te raraunga i waenga tari onāianei me ā muri ake te uaratanga o te Rautaki mō tētahi Aotearoa momoho me te whaihua i te ao matihiko.
Āpitihanga 5 — Te mārama ki tō tātau wāhi matihiko
E ai ki tērā kua kōrerohia i roto i te Rautaki, ina kōrero tātau mō te ‘matihiko’ i roto i tēnei Rautaki, kei te kōrero tātau mō tētahi pūnaha rauropi rerekē kei roto ko ēnei:
- ngā pūmanawa mārō me te pūmanawa rorohiko
- te tūāhanga me ngā raraunga
- ngā whakapānga me ngā whakamahinga o te pūmanawa mārō, pūmanawa rorohiko me ngā raraunga
- ngā ture me ngā kaupapahere e whakahaere ana i ngā hangarau matihiko me ngā whakamahinga
- ngā pūnaha oha-pori whānui ake e noho ana ngā hangarau matihiko i roto.
E tūmanako ana mātau ka rite tonu ēnei āhuatanga o te wāhi matihiko i roto i te wā, engari ka rerekē pea te āhua ina whakatinanahia.
E whakaatu ana te Tūtohi 2 i ngā āhuatanga rerekē me ētahi tauira onāianei mō tēnā, mō tēnā. Ehara tēnei i te rārangi whānui engari e tohu ana i te hōhonu me te whānui o te āhua o te ‘matihiko’ i te wā i tuhia.
| Āhuatanga | Whakaahuatanga | Ngā tauira onāianei |
|---|---|---|
| Pūmanawa mārō | Ngā mea ōkiko | Ngā rorohiko, rorohikopona, waea atamai, mīhini keretao, maupane ao mariko, pūoko, pouara, matatopa, tukuoro atamai, utauta ā-ipurangi |
| Pūmanawa rorohiko | Te waehere rorohiko | Akoranga ā-ture me te mīhini / ngā hātepe papatono me ngā tauira AI, ngā API, paetukutuku, kēmu, taupānga |
| Tūāhanga me ngā tāuru | Ngā waea i muri i te pātū | Te ipurangi ake, te tukutuku whānui o te ao, haumarutanga apa whatunga me te haumarutanga kawa ipurangi, ngā paerewa me ngā kawa tukutuku, huinga raraunga, taura, amiorangi, pokapū raraunga |
| Ngā whakapānga me ngā whakamahinga | Ngā mea ka hangaia e koe mā te pūmanawa māro me te pūmanawa rorohiko | Ngā pūhara pāpāho pāpori, tāonenui atamai, māhanga matihiko, te Ipurangi o ngā Mea, ngā utauta whakauru ki te manapori / ngā pūhara, te tuari ōhanga ratonga, ngā ratonga oha takitini, whakaratonga ratonga, whakahaerenga whakaputaranga, whakahou anō i te rāngai (tāke, hauora, mātauranga, ikiiki), moni whitirangi, tuakiri matihiko, FinTech / AgriTech, aha atu, aha atu. |
| Ngā ture me ngā kaupapahere | Te āhua e tukua ana, e whakatenatenahia ana hei whakamahi i ngā hangarau matihiko me ngā raraunga. Kei roto i tēnei ko ngā ture, ngā whakaaetanga ā-ao, ngā paerewa me ngā aratohu tikanga mahi pai rawa, ā, me tautuku katoa ēnei ki Te Tiriti o Waitangi me ōna mātāpono. |
Te whakamahi i ngā raraunga:
Me pēhea te hanga / hoahoa hangarau:
Ngā whakaaetanga me ngā rūnanga ā-ao:
Te whakamaru mai i te whakamamae:
|
| Te pūnaha whānui ake | Te āhua me te wāhi e whakaūngia ana ngā hangarau matihiko |
|
Te waihanga i Te Rautaki Matihiko mō Aotearoa
He mea hanga tēnei Rautaki e tētahi rōpū nō ngā tari me ngā āpiha nō:
- Hīkina Whakatutuki (MBIE)
- Tatauranga Aotearoa
- Te Tari Taiwhenua (DIA)
- Te Tari o Te Pirimia me te Kōmiti Matua (DPMC), me
- te National Cyber Security Centre (NCSC).
I whiwhi tautoko a Hōnore Tākuta David Clark, Minita mō te Ōhanga Matihiko me Ngā Whakawhitiwhitinga mai i ana hoa o te Rōpū Minita Matihiko i te wā i hangaia tēnei Rautaki.
Whiwhi mōhio anō mō tēnei Rōpū i Āpitihanga 2 — Ngā mema o te Rōpū Minita Matihiko.
Ngā Whakamihi
Te hunga puta noa i te motu i āwhina ki te waihanga i tēnei Rautaki mā te whakauru mai ki te tukanga kōrerorero tahi me te tāpaetanga kōrero mō te tuhinga matapakinga Te koke ki tētahi Rautaki mō Aotearoa, Oketopa ki te Tīhema 2021.
Ka rawe te rongo i ngā whakaaro mai i ngā tini tāngata i tae atu ki ngā hui mariko, i tuhi tāpaetanga kōrero, me te tāpiri i ō rātau whakaaro me ā rātau kōrero ki te matapakinga tuihono.
Tēnā rawa atu koe.
ISBN
- ISBN (tuihono) 978-1-99-104126-5
- ISBN (tānga): 978-1-99-104127-2
Last updated
