Otootoga o le maua ma le faaaogāina o faiga Faainitaneti — lipoti tagata Pasifika

“Soia le talanoa soo i mea sa talanoaina muamua, faatino loa galuega — e tuai ai matou ia te oe.” O se faataitaiga lena o manatu na faafofoga i ai le Department of Internal Affairs i faatalatalanoaga na fai ma tagata Pasifika i le 2020 e saili ai poo ā mea latou te iloa o loo faalavelavea ai le maua ma le faaaogāina o faiga faainitaneti.

O le vaaiga taula‘i a le malo ia mafai e tagata uma ona maua mea o loo latou moomia e auai ai, faasoa, ma maua mea aogā mai faiga faainitaneti — maua (fesootaiga lelei, taugofie ma mauagofie), tomai, faatuatuaga, ma faanaunautaiga.

E silia ma le 8 pasene le faitau aofai o tagata Pasifika i totonu o Niu Sila, ma e telē le sao o tagata Pasifika i lo tatou faasinomaga aoao atoa ai ma lo tatou tamaoaiga, aganuu ma le soifua manuia lautele. Peitai, o le to‘a 1 mai le to‘a 5 o tagata Pasifika i totonu o Niu Sila i le va o le 16 ma le 65 tausaga le matutua o i latou nei e lē o maua le tomai i tulaga masani faakomepiuta[Footnote 1] — ma o se fua e faaluaina lea mo i latou e lē o ni tagata Pasifika.

O loo folasia i le Otootoga o le maua ma le faaaogāina o faiga Faainitaneti — lipoti tagata Pasifika iuga mai suesuega aogā e tusa ai ma tulaga o feagai ma tagata Pasifika i faiga faainitaneti. E fasefulufitu tagata e eseese le matutua ma ituaiga tupuaga eseese, ma nofoaga eseese, sa faatalanoaina. Na faasoa mai o latou manatu ma tulaga na feagai ma i latou i faiga faainitaneti o loo latou maua ma faaaogā ma tulaga foi e lē o mafai ai ona latou maua atoatoa ma faaaogā le initaneti i le tulaga o ni:

• tagata taitoatasi, taitai, tagata galulue tauofo ma tagata faigaluega

• tagata o loo fesootai ma ekalesia, afioaga, tupulaga Pasifika, tagata faasino i le LGBTTQI+ / MVPFAFF, matagaluega a le malo ma matātā faatekonolosi.

Iuga

Na atagia mai le suesuega le tele anoanoa‘i o mafuaaga ma aafiaga o le mauaina ma le faaaogāina o faiga faainitaneti ma le lē mauaina ma le faaaogāina o faiga faainitaneti ma, mo le tagata Pasifika lava ia, e fuafua lava i lo latou tulaga taitoatasi, o totonu o le aiga ma le afioaga.

Iuga tāua

• E tāua tele le sao o tagata Pasifika i le atinaega o aoaoga e a‘oa‘o ai tomai, auaunaga ma polokalame ina ia faamautinoa o loo talia ma faaaogā e tagata lautele ma latou lagolagoina — “E sili atu ona iloa lelei e tagata mea e aogā mo isi tagata.”
• O le tau o masini faatekonolosi ma le faiga e fesootai ai i le initaneti ua fai lea ma faalavelave — “E lē o se mea faigata le filifili pe faatau le top up o le telefoni e $20 pe faatau ai le meaai o le afiafi.”
• O le faatumauina pea o channels e lē moomia ai faiga faainitaneti e maua ai auaunaga a le malo o se vaega tāua — o loo faasolo lava ina faaaogā tele e faalapotopotoga le initaneti e maua ai auaunaga, ma lē faigofie ai mo tagata e lē o maua ma faaaogāina faiga faainitaneti, auā ua atili faigata ai ona latou mauaina auaunaga, o fesoasoani ma mea e agavaa i ai, ma ua faatupulaia ai le lē faatāuaina o i latou.
• E moomia le faia o ni aoaoga e a‘oa‘o ai tomai i le faaaogāina o le initaneti, ma ia a‘oa‘oina i auala e fiafia i ai tagata Pasifika e a‘oa‘o ai — e faatino e isi tagata Pasifika, i le latou gagana muamua ma faaaogā ai ata. O se auala lea e lagolagoina ai tagata Pasifika ia maua auaunaga, maua galuega faatumauina, atiae ai a latou pisinisi ma puipuia ai lo latou saogalemu a o faaaogā le initaneti.
• E moomia ona faatoateleina tagata Pasifika i totonu o galuega faatekonolosi , ma mafai ai ona tele auaunaga eseese e ausia ai manaoga faainitaneti o tagata Pasifika — e ui lava i le 25% o tagata Māori ma tagata Pasifika i le faitau aofai o tagata o le atunuu, e na o le 2 pasene o loo faigaluega i matātā faatekonolosi.[Footnote 2]

Finagalo na faaalia mai e tagata ia i matou

Mauaina

O le iloa faaaogā o masini faatekonolosi ma tekonolosi a o laitiiti, o se auala lelei lea i aoaoga mo se tasi, o mea e fiafia i ai ma faasolo atu ai i se galuega.

E le gata i le tau o masini faatekonolosi, ae o nisi tagata e lē o mautinoa pe faapefea ona fesootai i le initaneti i le fale. E mafai foi ona faafaigata ona malamalama i le uiga o le wifi ma e faapefea foi ona maua le wifi e maua fua i nofoaga faitele. E mafai e ekalesia ma vaega o afioaga ma tagata lautele ona faaitiitia nei lu‘itau ae lē mafai ona latou tafiesea atoatoa.

E mananao foi tagata Pasifika i faamatalaga ma auaunaga mai le malo ia fetaui lelei ma tagata, ma faafaigofie le Gagana Peretania ma Gagana Pasifika o loo tusia ma faaaogā ai.

Tomai

E faigata i tagata matutua Pasifika ona faamasani i le lavelave o faiga faatekonolosi. E aofia ai le taumafai e malamalama i le eseesega o le faaaogā o le wifi e fesootai ai i le initaneti pe a faatusa i data e faaaogā i le telefoni feaveai, po o le iloa e mafai ona vili le telefoni i le fale mai le telefoni feaveai. O le isi itu sili ona faigata mo tagata matutua o le malamalama lea i aogā o apps e faaaogā ai le initaneti, o feau e mafai ona lafo fua ma faafesootai ai pe a faatusa i telefoni feaveai e totogi muamua faatoa mafai ona vili ma text ai. O le vave ona fesuisuiai o faiga ma ituaiga auaunaga, faatasi ai ma le eseese o ituaiga masini faatekonolosi ma ituaiga, o itu nei ua atili ai ona nenefu le malamalama o tagata matutua — “… ae o loo naunau e fesoasoani le tasi i le isi.”

Sa ta‘ua le tāua o le faia o aoaoga e a‘oa‘o ai tomai e faatino e tagata lava o le afioaga mo soo se augatupulaga, ma e tatau ona faia i se auala e fetaui ma aiga ma faatino e tagata o le ekalesia ina ia atiae ai le faatuatuaga, o le talitonuga malosi e mafai ai ona talosaga mo se fesoasoani, ma faatumauina le maua o le fesoasoani. Na ta‘ua e i latou na faatalanoaina totino, e aupito sili ona aogā le leitio ma video mo aoaoga e a‘oa‘o ai tomai mo tagata Pasifika. Na faailoa foi le tāua o aoaoga e a‘oa‘o ai faiga faainitaneti e taofia ai faamatalaga taufaasese. “Ta te popole lava i le fai o le telefoni a lo‘u tina auā a vili atu ai se tasi ma faapea atu o loo valaau mai le IRD poo leoleo, na te talitonu ai lava.”

E moomia le faaleleia o auala e maua ai fesoasoani tupe mo aoaoga e a‘oa‘o ai polokalame i tomai faainitaneti. “E aupito i maualalo lava tagata Pasifika o loo talosaga mo fesoasoani tau tupe. E mafua le tulaga lea ona o le tele nauā o faamatalaga e faatumu ma tulaga e tatau ona ausia ma le manatu e lē o fetaui ma i latou.”

E mananao foi tagata Pasifika ia faia atinaega i tomai faainitaneti i totonu a latou pisinisi ina ia mafai e pisinisi ona malamalama i le aogā i le pisinisi o le faaaogāina o metotia faainitaneti, faiga ma faamatalaga / puipuiga o faamaumauga. “Afai e lē o mafai ona e maua ma faatau atu au auaunaga pe faalauiloa oe lava i luga o faiga faainitaneti, o tulaga nei e faafaigata ai ona e maua se mea.”

Faatuatuaga

E iai nisi na faatalanoaina na faailoa le leai o se faatuatuaga e faaaogā le initaneti (e aofia ai le faaaogā o wifi e maua fua i nofoaga faitele), ma e iai le popolega i le faaaogāina o tekonolosi i se auala e 'saogalemu' e malupuipuia ai faamatalaga e patino ia i latou lava. Na latou ta‘ua foi le telē o le faatuatuaga i tagata matutua Pasifika, ma o le mea lea e tāua ai le malamalama i le aogā o faiga faainitaneti. E sili atu ona faatuatuaina e tagata matutua Pasifika pe afai latou te faafofoga i faamatalaga i le latou lava gagana ma a‘oa‘o mea o loo faasino atu e tupulaga laiti i totonu o aiga. “O tagata Pasifika e ese ma le … tāmau i faiga ua masani ai …, o le mea lea latou te … tetee ai i mea latou … te lē faatuatuaina — ona atili ai lava lea ona leai se agai i luma.”

Na ta‘ua e i latou na faatalanoaina, e manatu nisi tagata Pasifika ua ova nauā fesootaiga a le malo ma tagata Pasifika mo le aoina atu o faamaumauga ae laitiiti lava se taui e maua mai ai. Na latou ta‘ua le moomia ona toe atiae le faatuatuaga o tagata matutua Pasifika i polokalame a le malo e maua ma faaaogā ai faiga faainitaneti. “Ua 'matuai lofituina' tagata Pasifika i le tele o suesuega ae leai ma se galuega ua faia … Tatou agai ese mai le 'Tatou siitia le malamalama' i le 'O le ā le isi laasaga'?” “E pei ona e vaaia i itulau a le malo i luga o le Facebook … [o loo taumafai] e fesootai atu i [tagata] … ae ua leai se faatuatuaga i le malo.”

Na ta‘ua e tagata na faatalanoaina atugaluga i faiga faailogalanu i luga o le initaneti faasaga i tagata Pasifika. E iai lo latou manatu i le faatupulaia o manatu faailogalanu, vaega ma suiga i luga o le initaneti ma e lē o afaina i le tele o tulafono poo taunuuga e tatau ona iai. “Faafesagaiga totino, … o tagata e lē mananao e ave seseina se manatu faapea o i latou o ni tagata faailogalanu, ae sili atu ona fiafia e fesootai i luga o le initaneti.”

Faanaunautaiga

O le fesootai ma aiga ma afioaga e faatupulaia ai faanaunautaiga i tagata Pasifika e faaaogā tekonolosi faainitaneti auā o le fatu atoa o meafai a tagata Pasifika o le aiga. “E tāua le faasalalau tuusa‘o o faatasiga e pei o maliu ma faatalanoa faaiuga tetele e se aiga, ina ia mafai ai e tagata uma ona auai.”

O fesootaiga televavave o se faiga ua lauiloa ma faaaogā tele e tupulaga ma ē matutua e maua ai talafou o le Pasifika, e fesootai ai i aiga, uo, tagata ma aganuu, ma vave ai ona fesootai ma faamaopoopo faatasi ai tagata mo faatasiga faitele.

Na ta‘ua e i latou na faatalanoaina ua mafai i faiga faainitaneti ona faailoa atu ai aganuu faa-Pasifika i tagata Pasifika ma isi tagatanuu Niu Sila ma ua mafai e faiga faainitaneti ona fesootai ai nofoaga e vava mamao / tagata o loo faanofoesea, ma e faaosofia ai aoaoga i aganuu. Peitai, na latou ta‘ua foi e iai le manatu i le toatele o tagata matutua Pasifika e tatau ona tuugutu tu ma agaifanua e fesootai ai augatupulaga, ma e faigata ona iloa tonu aganuu ua faaaogā e isi i se auala e mafai ai ona ave se mataupu i le tulafono, pe tuliloaina ai se mataupu, pe afai ua faaaogā mataupu tau aganuu ua maua i luga o le initaneti e aunoa ma se faatagana.

Aafiaga o le salalau o le COVID-19 i le lalolagi

A o lei tulai mai le COVID, sa iai le manatu o tekonolosi o se mea e patino i isi tagata. I le taimi nei, ua iloa foi le aogā i o tatou tagata.

Na ta‘ua e i latou na faatalanoaina le manino lelei i le salalau ai o le COVID-19 i le lalolagi o le eseesega o faiga faainitaneti i totonu o Niu Sila, ma na afaina ai tagata Pasifika e lei mauaina ma faaaogāina faiga faainitaneti. Na faailoa manatu faapea na faatupulaia le maualuga o le aofai o tagata Pasifika na faafaigata ona faigaluega, fai meaaoga a le fanau i le fale, ma maua faamatalaga mai auaunaga e aogā i le vaitaimi na faamalosia ai le nonofo i fale.

Na faigata le faigaluega mai le fale mo aiga e toatele tagata o nonofo faatasi ai (ma o nisi aiga na siitia e nonofo faatasi ma isi aiga e sefe ai tupe ina ua lē toe iai ni galuega). “Na mafai ona faaaogā e tagata le Zoom mai totonu o le kapoti lavalava, vae o le moega, totonu o le taavale — auā ua leai se avanoa i le fale mo tagata uma e faigaluega mai ai.”

E aafia gofie tagata Pasifika i faamatalaga sese o loo faasalalau i fesootaiga televavave. Peitai, na faaaogā e ekalesia le initaneti (na faasino i ai e tupulaga le faiga e faaaogā ai le tekonolosi) ma na faasoa ai feau tāua e uiga i le faama‘i ua salalau i le lalolagi. Na fautuaina e ekalesia tagata i nofoaga e fai ai siaki o le COVID-19, maua ai meaai, ma maua ai le fesoasoani. E faaaogā foi e tagata le Facebook e maua ai faamatalaga lata mai.

Faaiuga

O loo faaalia i le suesuega lenei le tāua ma le aogā o fesootaiga e malosi ma maua ai le fesoasoani e pei ona maua e tagata Pasifika i totonu o aiga, ekalesia ma afioaga. O tulaga nei ua maua ai le avanoa mo le malo, fesootaiga televavave ma isi faalapotopotoga e faaaogā ai fesootaiga nei e lagolago ma faaauupega ai tagata Pasifika e faamalosia o latou tomai faainitaneti.

Laasaga o sosoo mai

Mo le iloiloina totoa o iuga o le lipoti lenei, o le a faaaogā e le Department of Internal Affairs fonotaga e fai faavaega i le 2021 e fesootai ai ma paaga tāua ma faalapotopotoga tumaoti. O le a faasoa atu foi le lipoti i Minisita ma fautuaina ai galuega faatino a le Malo e faatuputeleina ai faiga faainitaneti.